Dunya Uyghur qurultiyi 8-nöwetlik qurultayning rehberlik qatlimini saylap chiqti

Dunya Uyghur qurultiyining 8-nöwetlik re'isi turghunjan alawudun. 2024-Yili 26-öktebir, sarayéwo

26-Öktebir küni, bosniyede échiliwatqan dunya Uyghur qurultiyi (d u q) 8-nöwetlik omumiy wekiller yighinida démokratik usulda bélet tashlash we ashkara nazaret qilish arqiliq qurultayning yéngi rehberliri saylap chiqildi.

Bu qétimqi saylamda turghunjan alawudun qurultay re'islikige, erkin exmetow, zumret'ay erkin we abduréshit abdulhamitlar mu'awin re'islikke saylandi. “Uyghur herikiti” teshkilatining diréktori roshen abbas bolsa qurultay ijra'iye komitétining re'islikige saylap chiqildi. Ijra'iye komitétining mu'awin re'islikige abdulhemid qaraxan, erkin zunun, mutellip qurban we polat sayimlar saylandi. Dunya Uyghur qurultiyining sabiq re'isi dolqun eysa bu heqte bu saylamning nahayiti démokratik we chet'ellik közetküchilerning nazariti astida tamamlan'ghan adil bir saylam bolghanliqini bildürdi.

Uyghur Herikiti

Bu qétimqi qurultay saylimining aldida, yeni chüshtin burunqi yighinida Uyghur akadémiyesi re'isi doktor rishat abbas, ottura asiya Uyghurlirigha wakaliten qehriman xojamberdi, “Xelq'ara sherqiy türkistan teshkilatlar birliki” ning mu'awin re'isi loqmanjan hira, “Sherqiy türkistan ölimalar birliki” ning bash teptishi abdul'ehed uchqun, “Sherqiy türkistanliqlar fédératsiyesi” ning mu'awin re'isi mahmut imin damollam, doktor sultan mahmut qeshqeri, “Ili meshrep wexpisi” din qudret ghulja qatarliq sherep méhmanliri arqa-arqidin sözge chiqip, 8-nöwetlik qurultaygha pikir-tekliplirini, tebriklirini we eng yaxshi tileklirini teqdim qildi.

RFA/Hebibulla izchi

Arqidinla, perhat muhemmidining riyasetchilikide aldi bilen qurultay sabiq re'isi dolqun eysa we uning re'islik dewridiki qurultay rehberlik qatlimi 7-nöwetlik qurultaydin hazirghiche qolgha keltürgen netijiliri we tejribe-sawaqliri yekünlep üch yilliq xulase doklatini oqup ötti. Qurultay ijra'iye komitétining re'isi ömer qanat mezkur komitétining ötken üch yilliq xizmet xulasisini teqdim qildi. Sabiq re'is dolqun eysa sözide 7-nöwetlik qurultayning “Sherqiy türkistan dawasini xelq'aralashturush we Uyghur irqiy qirghinchiliqini toxtitish” ni nishan qilghan pa'aliyetlirini qisqiche eslep ötti.

RFA/Hebibulla izchi

Arqidinla sabiq re'is dolqun eysaning riyasetchilikide 7-nöwetlik qurultayda saylap chiqilghan d u q rehberlirining istépanamisi tapshuruwélinip, ularning aldinqi üch yilda körsetken pidakarliqliri üchün teqdirname hediye qilindi. Shundaqla 8-qurultayning saylam nazaretchiliki üchün aliy diwan hey'iti qurulup, saylam tertipi we rehberlik namzatliri tizimliki élan qilindi.

Bu qétimqi saylamgha ottura asiyadiki qurultay wekilliri kélelmigenliki seweblik ularning saylamgha qatnishishi tor arqiliq awaz bérish shekli sheklide tamamlandi. Kechlik tamaqtin kéyin élan qilin'ghan saylam netijisi qurultay wekillirining qizghin alqishigha érishti. Shuningdek yillardin buyan d u q ni maddiy we meniwi jehettin zor küch bilen qollap kelgen shexslerge guwahname tarqitip bérildi. Neq meydandin ziyaritimizni qobul qilghan roshen abbas xanim özining bu saylam heqqide oylighanliri we özining saylan'ghandin kéyinki hés-tuyghulirini radiyo anglighuchilar bilen ortaqlashti.

RFA/Hebibulla izchi

 Bu qétimqi qurultayda wezipe alghan ayallar we yashlar köp sanliqni teshkil qilghan bolup, 8-nöwetlik qurultayning re'is we mu'awin re'isliri, herqaysi komitétlarning mudir we mu'awin mudirliri bir-birlep sehnige chiqip jama'et bilen qayta didarlashti. Bu munasiwet bilen 8-nöwetlik qurultayning re'isi turghunjan alawudun radiyomiz ziyaritini qobul qilip, özining bu saylam heqqidiki tesirati we bundin kéyinki nishanliri heqqide oylighanlirini radiyo anglighuchilar bilen ortaqlashti.

 Bosniyede échilghan bu 8-nöwetlik qurultayning saylimi xitayning bésimi, parakendichilikliri we térrorluq tehditlirige qarimay, bügünmu oxshashla türkiye, amérika, en'gliye qatarliq döletlerning bezi diplomatliri we axbaratchilirining qatnishishida, shuningdek sarayéwo saqchi idarisi we bosniye alahide heriket qismining muhapizitide daghdughiliq dawam qildi.