Долқун әйса әпәнди д у қ ниң 20 йиллиқи мунасивити билән чақириқ елан қилди

Әнқәрәдин ихтиярий мухбиримиз әркин тарим тәйярлиди
2024.04.16
duq-chaqiriq-dolqun-eysa.jpg Д у қ германийәниң мюнхен шәһиридики мәркәз ишханисида өткүзүлгән д у қ қурулғанлиқиниң 20 йиллиқини хатириләш паалийити һәққидә чақириқ елан қилиш йиғинида д у қ ниң рәиси долқун әйса әпәнди сөзлимәктә. 2024-Йили 14-апрел, мюнхен.
RFA/Erkin Tarim

Дуня уйғур қурултийи 14-апрел күни германийәниң мюнхен шәһиридики мәркәз ишханисида йиғин чақирип, 5-айниң 3-күнидин 6-күнигичә мюнхенда өткүзүлидиған д у қ қурулғанлиқиниң 20 йиллиқини хатириләш паалийити һәққидә чақириқ елан қилди. Чақириқта барлиқ уйғурларни бу паалийәткә тәклип қилди.

14-Апрел күнидики дуня уйғур қурултийи рәиси долқун әйса әпәндиниң риясәтчиликидә өткүзүлгән қурултай қурулғанлиқиниң 20 йиллиқи тойиға тәйярлиқ хизмәт йиғиниға германийәдики җүмлидин мюнхендики сәрхиллар, дуня уйғур қурултийи рәһбәрлири, германийә уйғур мәдәнийәт-маарип бирликиниң мәсуллири 3 мәшрәпниң йигит башлири вә ханим-қизлар қатнашқан. Мәзкур йиғинда 5-айниң 3-күнидин 6-күнигичә мюнхенда өткүзүлидиған д у қ ниң 20 йиллиқини хатириләш тойиға һазирлиқ хизмәтлири музакирә қилинип, хизмәт тәқсимати қилинған. Йиғин ахирида долқун әйса әпәнди бу һәқтә мәхсус чақириқ елан қилди.

У, сөзини мундақ башлиди: “дәл буниңдин 20 йил илгири2004-йили 4-айниң 16-күни, йәни 20 йил илгири мушу шәһәрдә, шу вақитта дуняниң һәр қайси җайлирида паалийәт елип бериватқан уйғур тәшкилатлириниң мәсуллири вә вәкиллири җәм болуп шәрқий түркистан дәвасиниң хәлқарадики әң йүксәк һоқуқлуқ бир мәркизий оргини болған дуня уйғур қурултийини қуруп чиққан идуқ. Мана әмди тәшкилатимизниң қурулғанлиқиниң 20 йиллиқини хатириләш алдида туруватимиз. Бу 20 йил җәрянида дуняниң һәр қайси җайлиридики вәтәнпәрвәрлиримизниң һәр түрлүк маддий вә мәниви ярдими билән бүгүнки күндә дуня уйғур қурултийи хәлқарада уйғур дәвасиға вәкиллик қилидиған, уйғур хәлқиниң һәқ вә һоқуқини қоғдайдиған бир сәвийәгә келип, хәлқимиз үчүн хизмәт қилиш пурситигә игә болалидуқ. Мушу өткән 20 йиллиқ хизмәтлиримизниң хуласиси шәклидә 5-айниң 3-күнидин 6-күнигичә болған 3 күн җәрянида мюнхендики барлиқ уйғурларниң саһибханилиқ қилиши билән дуняниң һәр қайси җайлиридин кәлгән меһманлиримизни күтүвелишқа тәйярлиқ қиливатимиз.”

Долқун әйса әпәнди чақириқида үч күнлүк паалийәтләрниң мәзмуни тоғрисида тохталди. У, мундақ деди: “бу үч күн җәрянида һәр хил паалийәтлиримиз болиду. Меһманларни силәрниң маддий ярдимиңлар билән сетивалған мушу мәркизимиздә күтүвалимиз. Дуня уйғур қурултийиға көңүл бөлүватқан карханичилиримизниң, тиҗарәтчилиримизниң, вәтәндашлиримизниң вә ханим-қизлиримизниң ярдәм қилиши билән уйғур мәдәнийәт мәркизимизни, ишханимизни сетивелип рәсмий хизмәткә ачтуқ. 20 Йиллиқ тойимизда бу йеримизни силәргә тонуштуримиз. Биз тәйярлиқ хизмәтлиримизни бу мәркәздә елип бериватимиз. Бу үч күнлүк паалийәткә диний өлималиримиз, зиялийлиримиз, җамаәт әрбаблиримиз келиду. Көп санда чәт әллик мутәхәссисләрму келиду. Булар билән сөһбәт йиғинлирини өткүзимиз. Дуняниң һәр қайси җайлиридин уйғур сәнәтчилиримиз келиду. Бу сәнәтчилимиз бизниң миллий мәдәнийәтлиримизни намайәндә қилиду. Демәк биз мол мәзмунлуқ вә көп хиллиққа игә паалийәтләр билән дуня уйғур қурултийиниң 20 йиллиқ тойини өткүзимиз.”

Дуня уйғур қурултийи мәсуллириниң ейтишичә, хатириләш паалийитигә 20 әтрапида дөләттин 300 әтрапида вәкил вә меһман иштирак қилидикән. Бу дуня уйғур қурултийиниң 20 йиллиқ тарихида өткүзүлгән тунҗи қетимлиқ кәң-көләмлик паалийәт икән. Долқун әйса әпәнди дуня уйғур қурултийиниң бу шанлиқ тойиға дуняниң һәр қайси җайлирида йүрики вәтән вә милләт үчүн селиватқан тәклипнамә тапшуруп алған яки алмиған барлиқ уйғурларниң қатнишишини қарши алидиғанлиқини ейтти.

Д у қ ниң муавин рәиси пәрһат муһәммәди әпәнди, бүгүн хәлқаралиқ бир тәшкилатқа айланған д у қ ниң интайин мурәккәп бир хәлқаралиқ вәзийәттә дуняға кәлгәнликини, өткән 20 йиллиқ мусапә җәрянида зор утуқларни қолға кәлтүргәнликини ипадә қилди. У, сөзидә, д у қ һазирғичә қолға кәлтүргән утуқларни техиму көп уйғурлар билән ортақлишиш үчүн 20 йиллиқ тойиға көп санда меһман тәклип қилғанлиқини, шуңа арқа сәп хизмәтлиридә бәзи қийинчилиқларға дуч келидиғанлиқини, уйғурларниң буни тоғра чүшинип һәмкарлишишини илтимас қилидиғанлиқини тәкитлиди.

Д у қ ниң диний хизмәтлиригә мәсул иҗраийә һәйити муавин рәиси, йиғинниң тәйярлиқ комитети мәсули турғунҗан алавуддин әпәнди тәйярлиқ хизмитиниң яхши кетиватқанлиқини, әгәр қатнишишни халайдиған уйғурлар болса өзи билән алақә орнатса болидиғанлиқини тәкитлиди. У, бу қетимқи йиғинда шәрқий түркистанниң бесивелинған земин икәнлики тоғрисида тәйярланған доклатни йиғин әһлилиригә тәқдим қилинидиғанлиқини билдүрди.

Игилишимизчә, дуня уйғур қурултийи заманида муһаҗирәттики уйғур миллий һәрикитиниң йетәкчи органлири һесабланған шәрқий түркистан (уйғуристан) миллий қурултийи билән дуня уйғур яшлири қурултийиниң бирлишиши нәтиҗисидә 2004-йили 16-апрел германийәниң мюнхен шәһиридә қурулған. 20 Йиллиқ бир тарихий мусапини баштин көчүргән д у қ ниң бүгүнки күндә шәрқий түркистан миллий муҗадилисиниң вәкиллик оргини сүпитидә өз хәлқиниң ишәнчигә һәмдә б д т, явропа иттипақи вә америка башлиқ нурғун дөләтләрниң етирап қилишиға еришиши, әлвәттә биһесаб бәдәлләрниң мәһсули икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.