Bosniyede chaqirilghan 8-nöwetlik dunya Uyghur qurultiyi “Da'ésh” ning tehditige uchridi
2024.10.24
D u q ning 8-nöwetlik qurultay yighinining ijra'iye komitéti yighini chaqirildi. 2024-Yili 24-öktebir, sarayéwo bosniye.
RFA/Hebibulla Izchi
Nöwette bosniyening paytexti sarayéwoda échilmaqchi bolghan 8-nöwetlik dunya Uyghur qurultiyining teyyarliqliri pütüp, dunyaning her qaysi jayliridiki wekiller bügün 24-öktebir küni bosniye paytexti sarayéwogha yétip keldi. Shundaqla bügün etigende, dunya Uyghur qurultiyi ijra'iye komitéti jiddiy yighin chaqirip, bu qétimqi qurultayning aldi-keynidiki muhim mesililer we bixeterlik tedbirliri heqqide orunlashturush élip bardi.
Dunya Uyghur qurultiyining sabiq re'isi dolqun eysa yighindin kéyin neq meydandin ziyaritimizni qobul qilip, bügün etigen özining namida saxta élxetler tarqitilghanliqini, xitay terepning bosniyediki bezi muxbirlargha qurultayni qarilaydighan uchurlarni ewetkenlikini, bügün yene qurultayning yuqiri qatlam kishilirining da'ésh siyaqidiki kishilerning tehditige uchrighanliqini bildürdi.
Dunya Uyghur qurultiyi téléwiziyesidin iptixar abduréshit, bu uchur heqqidiki tepsilatlardin melumat berdi. U özining erebche bilidighanliqini, bu kishilerning teleppuzidin erep emeslikini bildürüp bu sin körünüshidiki bezi tepsilatlarni radiyo anglighuchilar bilen ortaqlashti.
Igilishimizche, bu qétimqi qurultaydin burun, qurultay yighini échilmaqchi bolghan “Tetil méhmansariyi” gha xitayning bosniyediki elchixanisi üch hesse artuq pul béridighanliqini we bu qurultayning échilishini bikar qiliwétishini éytip adem ewetken. Emma méhmansaray terep xitayning bu yolsiz telipini tijaret we adimiylik exlaqigha xilap dep ret qilghan. Bu heqte dunya Uyghur qurultiyi bérlin ishxanisi diréktori gheyur qurban, bu qurultayning aldida xitay terepning her xil tehdit we bésimlirigha duch kelgenlikini, emma qurultayning bundaq tehditlerge bash egmeydighanliqini, shundaqla da'ésh siyaqigha kiriwalghan azghunlarning hergizmu musulmanlargha wekillik qilalmaydighanliqini bildürdi.
Buningdin burun xitay hökümiti bosniyediki yighin mezgilide, sabiq re'is dolqun eysani tutidighanliqi heqqide tehdit salghanidi. Qurultay ishxanisi bu heqte, bu mesilining qurultayning mesilisi bolushtin halqip, hazir Uyghurlarni qollaydighan bezi küchlük döletler arilashqan xelq'araliq mesilige aylan'ghanliqini, 8-nöwetlik qurultayning ghelibilik échilidighanliqini, bezi döletlerning elchixanilirimu bu yighin'gha qatnishidighanliqini bildürdi.
Köp körülgen xewerler
RFA
- Ürümchidiki meshhur bina—“Rabiye qadir soda sariyi” ning chéqiwétilgenliki delillendi
- Kanada hökümitining on ming Uyghurni orunlashturushining tunji qedimi muweppeqiyetlik bésildi
- “Uyghur sen'et körgezmisi” ge yandashqan Uyghur qirghinchiliqi muhakime yighini bashlandi
- Rishat abbas amérika dölet mejliside Uyghur tili, medeniyiti we xatirisini qoghdashqa téximu köp iqtisad ajritishqa chaqirdi
- Nuri türkel: “Amérikaning anamni ekélishini Uyghurlargha körsitiwatqan ghemxorluqining ipadisi, dep qaraymen”
Köp körülgen xewerler
Tepsiliy xewer
- Norwégiyede ottura mektep oqughuchilirigha Uyghur irqiy qirghinchiliqi tonushturulghan
- Xelq'ara teshkilatlar: “Yashar shöhretning qismiti xitay kompartiyesining Uyghurlargha qiliwatqan ziyankeshlikining simwoli!”
- En'gliye parlaméntida en'gliye hökümiti Uyghur irqiy qirghinchiliqini étirap qilishqa chaqirildi
- CAB Doklati: “Xitayning Uyghurlarni basturushi ottura asiyada xitaygha qarita selbiy jama'et pikrini shekillendürdi”
- Xitay-pakistan munasiwitidiki dawalghushlar we pakistandiki Uyghurlar (1)