D u q ning 8-nöwetlik qurultiyi utuqluq axirlashti

8-Nöwetlik dunya Uyghur qurultiyi re'is we mu'awin re'is, ijra'iye komitéti re'isi we mu'awin re'isliri xatire sürette. 2024-Yili 27-öktebir, sarayéwo.

27-Öktebir küni dunya Uyghur qurultiyi (d u q)ning bosniyening paytexti sarayéwoda échiliwatqan 8-nöwetlik qurultiyida yépilish nutqi sözligen turghunjan alawudun nutqida 8-nöwetlik qurultaygha yéngidin re'is bolup saylan'ghandin kéyin “Dunya Uyghur qurultiyining sherqiy türkistanda dawam qiliwatqan irqiy qirghinchiliqni toxtitish üchün qilmaqchi bolghan ishliri” témisida toxtaldi. Shuningdek qurultayning yéngi bir nöwetlik re'isi bolushi süpiti bilen qurultay wekilliri, her qaysi döletlerning parlamént ezaliri we sherep méhmanlirigha özi we yéngi rehberlik hey'itining wedisini otturigha qoydi. Turghunjan alawudun bu toghrisida nuqtiliq qilip “Bizning axirqi nishanimiz Uyghur xelqining erkinliki we öz teqdirini özi belgileydighan hör we démokratik hoquqini, shundaqla sherqiy türkistanning höriyitini qolgha keltürüsh üchün küresh qilish” dep körsetti hemde qurultay nizamnamisige qoshulidighan bezi maddilar heqqidimu chüshenche berdi.

RFA/Hebibulla Izchi

Bu munasiwet bilen radiyomiz ziyaritini qobul qilghan turghunjan alawudun bu qétimqi qurultayda élip baridighan islahat we qurultay nizamnamisige kirgüzülgen bezi tüzitishler heqqide melumat berdi.

Qurultayning bügünki küntertipide yéngi bir nöwetlik qurultay rehberlik qatlimi öz komitétliridiki guruppilarni yéngidin qurup chiqqan idi. Yaponiyedin bu nöwettiki qurultayning bash teptishlikige saylan'ghan abdukérim abduraxman ziyaritimiz jeryanida özining bu qétimqi qurultaygha teptish bolup saylan'ghanliqining bir sherep we zor mes'uliyetke ige bir wezipe ikenlikini bildürdi.

RFA/Hebibulla Izchi

Kanadadin kelgen kewser kamil 7-nöwetlik qurultayda kishilik hoquq komitétining mudiri bolup saylan'ghandin buyan özining yashliqigha qarimay Uyghurlar duch kéliwatqan kishilik hoquq depsendichiliklirige qarshi bezi ünümlük xizmetlerni wujudqa chiqarghan idi. Netijide bu qétimmu oxshash wezipige tekrar saylinip, dunya Uyghur qurultiyining eng yash rehberliridin biri bolup qaldi. Bu munasiwet bilen neq meydanda 8-nöwetlik qurultayning her qaysi komitétlirigha saylan'ghan yéngi bir nöwetlik rehberlik qatlimini ayrim-ayrim ziyaret qilduq, ular özlirining bu komitétlargha re'is we mudir bolup saylan'ghanliqining hayajini we mes'uliyitini radiyo anglighuchilar bilen ortaqlashti.

Dunya Uyghur qurultiyining yétiliwatqan yash diplomati, aktip pa'aliyetchi zumret'ay erkin ana tilini pishshiq bilgendin bashqa birnechche chet'el tilidinmu yaxshi xewerdar bolup, hazirghiche dunya d u q xelq'ara munasiwetler diréktori, qurultay ayallar komitéti mudiri qatarliq muhim wezipilerni ötep kelgen. Bu jeryanda birleshken döletler teshkilati we bashqa köpligen xelq'ara sehnilerde Uyghur xelqi we qurultaygha munasiwetlik xizmetlerni utuqluq bir yaqliq qilip kéliwatqanliqi melum. U bu qétim qurultayning mu'awin re'islikige saylan'ghandin kéyin özining bu heqtiki hayajanliri we bundin kéyin qilmaqchi bolghan ishliri heqqidiki köz qarashlirini radiyo anglighuchilar bilen ortaqliship ötti.

RFA/Hebibulla Izchi

Bu qétimqi qurultay 27-öktebir küni kechte 22 dölettin kelgen wekiller, sherep méhmanliri, chet ellerning parlamént ezaliri, amérika we yawropa döletlirining közetküchiliri we herqaysi axbarat wasitilirining qatnishishida utuqluq axirlashti. Dunyaning her qaysi jayliridin kelgen wekiller we sherep méhmanliri yéngi bir nöwetlik rehberlik qatlimini tebrikleshti. Shuning bilen birge d u q we Uyghur xelqi üchün yéngi bir nöwetlik rehberlik qatlimidin kütidighan ümid-arzuliri we eng yaxshi tileklirini bildürüshti.

Qirghizistan Uyghurliri bu qétimqi qurultaygha élip kelgen sowgha qatarida qirghizistandiki ataqliq ressam sabit kamal oghli babajanning “Ikkinchi nöwetlik sherqiy türkistan jumhuriyiti” ning rehbiri exmetjan qasimining may boyaq resimni teqdim qildi, shuningdek yéngi re'is turghunjan alawudun'gha qirghizistan Uyghurliri namidin doppa kiydürdi.