Истанбулда д у қ вәхпәниң 2-нөвәтлик қурғучи һәйәтләр омумий йиғини чақирилди

Ихтиярий мухбиримиз әркин тарим
2021-11-29
Share
Истанбулда д у қ вәхпәниң 2-нөвәтлик қурғучи һәйәтләр омумий йиғини чақирилди Д у қ вәхпәниң истанбулдики ишханисида чақирилған 2-нөвәтлик қурғучи һәйәтләр омумий йиғинидин көрүнүш. 2021-Йили 28-ноябир, түркийә.
RFA/Erkin Tarim

Уйғур мәсилисиниң хәлқаралишишиға әгишип, дуня уйғур қурултийи дуняниң һәр қайсий җайлиридики паалийәтлирини техиму күчәйтишкә тиришмақта. Бу мәқсәт билән 2021-йили 3-айниң 27-күни түркийәдә дуня уйғур қурултийи вәхпиниң қурулған иди.

11-Айниң 28-күни д у қ вәхпәниң истанбулдики ишханисида 2-нөвәтлик қурғучи һәйәтләр омумий йиғини чақирилди. Йиғинға вәхпәниң башқуруш һәйәт әзалири вә тәптиш һәйәтлири қатнашти. Түркийә билән шәрқий түркистанниң истиқлал маршини оқуш билән башланғанбу йиғинда дуня уйғур қурултийи вәхпиниң рәиси абдурешит абдухәмит әпәнди хизмәт доклатини оқуп өтти.

Д у қ вәхпәниң истанбулдики ишханисида чақирилған 2-нөвәтлик қурғучи һәйәтләр омумий йиғинида шәрқий түркистан вәхпәсиниң сабиқ рәиси һамутхан гөктүрк вә доктор әркин әкрәм. 2021-Йили 28-ноябир, түркийә.
Д у қ вәхпәниң истанбулдики ишханисида чақирилған 2-нөвәтлик қурғучи һәйәтләр омумий йиғинида шәрқий түркистан вәхпәсиниң сабиқ рәиси һамутхан гөктүрк вә доктор әркин әкрәм. 2021-Йили 28-ноябир, түркийә.

У доклатида д у қ вәхпи қурулған күндин таки бүгүнгичә қилған хизмәтлирини аңлатти. У сөзидә мәзкур вәхпәниң қисқиғина вақит ичидә тәрәққий қилип, толуқ курс, магестирлиқ вә докторлуқ оқуватқан оқуғучилардин болуп, җәмий 101 уйғур оқуғучиға оқуш мукапат пули берәләйдиған сәвийәгә йәткәнликини, буниңдин кейин техиму көп уйғур оқуғучиларға оқуш мукапат пули бериш үчүн тиришидиғанлиқини оттуриға қойди.

Йиғинда д у қ ниң муавин рәиси доктор әркин әкрәм әпәнди, мәзкур вәхпәниң рәис вәкили дилшат баришчи әпәнди, муавин рәис әркин бәрдаш әпәнди, малийә ишлири мудири мәмәт әли әпәндиләр вәхпәниң бундин кейин немәләрни қилиши керәклики тоғрисидики тәләп-пикирлирини оттуриға қоюп өтти. Д у қ вәхпиниң рәиси абдурәшит абдухәмит әпәнди зияритимизни қобул қилип, бу йиғин тоғрисида бизгә тәпсилий мәлумат бәрди.

Д у қ вәхпәниң истанбулдики ишханисида чақирилған 2-нөвәтлик қурғучи һәйәтләр омумий йиғинида һәйәтләр. 2021-Йили 28-ноябир, түркийә.
Д у қ вәхпәниң истанбулдики ишханисида чақирилған 2-нөвәтлик қурғучи һәйәтләр омумий йиғинида һәйәтләр. 2021-Йили 28-ноябир, түркийә.

Йиғин ахирлашқандин кейин дуня уйғур қурултийиниң муавин рәиси доктор әркин әкрәм әпәндиниң тәшәббуси билән истанбулдики тархан уйғур рестоанида прагада чақирилған 7-нөвәтлик вәкилләр қурултийиниң вәкиллири билән йиғин өткүзүлди. Мәзкур йиғинда қурултайға баралмиған вәкилләрниң гуваһнамисини тарқитип берилгәндин кейин, бундин кейинки хизмәт пилани һәққидә музакирә елип берилди.

Йиғинда алди доктор әркин әкрәм әпәнди сөз қилип, д у қ ниң қурулуш мәқсити, қурулмиси, бесип өткән мусаписи вә хәлқарадики орни тоғрисида мәлумат бәргәндин кейин, 20 әтрапида вәкилгә гуваһнамилирини тарқитип берилди.

Мурасим ахирлашқандин кейин, д у қ вәхпәниң рәиси абдурәшит абдулхәмит әпәндини зиярәт қилдуқ. У бу паалийәтни өткүзүштики мәқситиниң д у қ ниң түркийәдә елип бармақчи болған паалийәтлири тоғрисида музакирә елип бериш икәнликини тәкитлиди.

Йиғинда пешқәдәм паалийәтчи, шәрқий түркистан вәхпәсиниң сабиқ рәиси һамутхан гөктүрк әпәндигә униң муһаҗирәттики шәрқий түркистан давасиға қошқан төһписи вә қилған хизмәтлири үчүн медал берилди. У йиғин ахирида өз туйғулирини баян қилип өтти.

Д у қ 7-нөвәтлик қурултийиниң вәкили әзиз уйғур әпәнди зияритимизни қобул қилип, бундин кейин күчиниң йетишичә д у қ қа хизмәт қилидиғанлиқини баян қилди.

Бу йил 3-айниң 27-күни чүштин кейин истанбулдики грәәнпарк меһманханисида д у қ вәхпәсиниң 1-нөвәтлик қурғучи һәйәтләр омумий йиғини чақирилған иди. Түркийәдә 1985-йили қурулған шәрқий түркистан вәхпәси, 1995-йили қурулған әйса йүсүп алптекин вәхпәси, 2000-йиллардин кейин қурулған султан сатуқ буғрахан вәхпәси вә шәрқий түркистан тәтқиқат вәхпәси қатарлиқ вәхпәләр һазирму актип паалийәт елип бармақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт