د ئۇ ق ئۇيغۇر دەۋاسىنى 2025-يىلىمۇ خەلقئارا كۈنتەرتىپتە تۇتۇپ تۇرۇشنىڭ كونكرېت تەدبىرلىرىنى مۇزاكىرە قىلدى

8-يانۋاردىن 12-يانۋارغىچە گېرمانىيەنىڭ ميۇنخېن شەھىرىدىكى دۇنيا ئۇيغۇر قۇرۇلتىيىنىڭ باش مەركىزىدە د ئۇ ق كەسپىي خادىملىرىنىڭ 2025-يىللىق خىزمەت پىلانلىرىنى مۇزاكىرە قىلىش يىغىنى بولۇپ ئۆتتى. يىغىنغا د ئۇ ق نىڭ مەركەزدىكى خادىملىرى ۋە ھەرقايسى ئەللەردىكى ئىشخانىلىرىنىڭ مۇدىرلىرى قاتناشتى.

يىغىنغا رىياسەتچىلىك قىلغان د ئۇ ق رەئىسى تۇرغۇنجان ئالاۋۇدۇن ئەپەندى بۇ خۇسۇستا توختالغاندا، ئالدى بىلەن بۇ يىغىننىڭ ئەھمىيەتلىك بولغان تەرەپلىرىنى تىلغا ئېلىپ، 2025-يىلى ئۇيغۇر دەۋاسىنى يالغۇز غەرب دېموكراتىك ئەللىرىدىلا ئەمەس، بەلكى تۈرك ۋە ئىسلام دۇنياسىدىمۇ تېخىمۇ كەڭ خەلقئارالاشتۇرۇشنىڭ چارە-تەدبىرلىرىنىڭ ئەتراپلىق مۇزاكىرە قىلىنغانلىقىنى تەكىتلەپ ئۆتتى. ئۇ سۆزىدە يەنە، مەزكۇر يىغىندا مۇھاجىرەتتىكى ئۇيغۇر مىللىي ھەرىكىتىنىڭ بىر بۆلۈك ياش ئىزباسارلىرىنى بىر ئارىغا جەم قىلىش ۋە ئۇلارنى تەربىيەلەشكە ئالاھىدە ئەجىر سەرپ قىلىش توغرىسىدىمۇ پىلان پىروگراممىلار تۈزۈلگەنلىكىنى ئەسكەرتتى.

RFA/Ekrem

د ئۇ ق نىڭ مۇئاۋىن رەئىسى زۇمرەتئاي ئەركىنمۇ بۇ يىغىن توغرىسىدا قاراشلىرىنى ئىپادە قىلىپ، 2025-يىلىنىڭ يەنە ئۇرۇش مالىمانچىلىقى بىلەن باشلانغانلىقىنى، بۇ سەۋەبتىن ئۇيغۇر دەۋاسىنى خەلقئارادا كۈنتەرتىپتە تۇتۇپ تۇرۇشنىڭ قېيىنغا توختايدىغانلىقىنى، بۇنىڭ ئۈچۈن د ئۇ ق نىڭ ئىنچىكە پىلانلارنى تۈزۈپ، تېخىمۇ كۆپ تىرىشچانلىقلار كۆرسىتىشىگە توغرا كېلىدىغانلىقىنى ۋە بۇ قېتىمقى كەسپىي خادىملار يىغىنىنىڭ مۇشۇ مەقسەتتە چاقىرىلغانلىقىنى بايان قىلدى.

د ئۇ ق ئۇچۇر ئاخبارات مەركىزىنىڭ مۇدىرى، د ئۇ ق نىڭ ئەرەب تىلىدىكى باياناتچىسى ئىپتىخار تەڭرىقۇتنىڭ بىلدۈرۈشىچە، بۇ قېتىمقى يىغىندا د ئۇ ق كەسپىي خادىملىرىنىڭ 2024-يىللىق خىزمەتلىرىدىن خۇلاسە چىقىرىلغان ۋە 2025-يىللىق خىزمەت تەقسىماتى ئورۇنلاشتۇرۇلغان. د ئۇ ق ھەر يىلىنىڭ بېشىدا كەسپىي خىزمەتچىلەرنىڭ يىغىنىنى چاقىرىپ كەلمەكتە ئىكەن. ئۇ سۆزىدە، ئۆزى مەسئۇل بولغان د ئۇ ق ئۇچۇر ئاخبارات مەركىزىنىڭ تەشۋىقاتلىرىنى كۆپ خىل تىلدا تېخىمۇ كۈچلۈك قانات يايدۇرۇش توغرىسىدىمۇ پىلانلار تۈزۈلگەنلىكىنى تىلغا ئالدى.