D u q Uyghur dewasini 2025-yilimu xelq'ara küntertipte tutup turushning konkrét tedbirlirini muzakire qildi
2025.01.13
8-Yanwardin 12-yanwarghiche gérmaniyening myunxén shehiridiki dunya Uyghur qurultiyining bash merkizide d u q kespiy xadimlirining 2025-yilliq xizmet pilanlirini muzakire qilish yighini bolup ötti. Yighin'gha d u q ning merkezdiki xadimliri we herqaysi ellerdiki ishxanilirining mudirliri qatnashti.
Yighin'gha riyasetchilik qilghan d u q re'isi turghunjan alawudun ependi bu xususta toxtalghanda, aldi bilen bu yighinning ehmiyetlik bolghan tereplirini tilgha élip, 2025-yili Uyghur dewasini yalghuz gherb démokratik elliridila emes, belki türk we islam dunyasidimu téximu keng xelq'aralashturushning chare-tedbirlirining etrapliq muzakire qilin'ghanliqini tekitlep ötti. U sözide yene, mezkur yighinda muhajirettiki Uyghur milliy herikitining bir bölük yash izbasarlirini bir arigha jem qilish we ularni terbiyeleshke alahide ejir serp qilish toghrisidimu pilan pirogrammilar tüzülgenlikini eskertti.
D u q ning mu'awin re'isi zumret'ay erkinmu bu yighin toghrisida qarashlirini ipade qilip, 2025-yilining yene urush malimanchiliqi bilen bashlan'ghanliqini, bu sewebtin Uyghur dewasini xelq'arada küntertipte tutup turushning qéyin'gha toxtaydighanliqini, buning üchün d u q ning inchike pilanlarni tüzüp, téximu köp tirishchanliqlar körsitishige toghra kélidighanliqini we bu qétimqi kespiy xadimlar yighinining mushu meqsette chaqirilghanliqini bayan qildi.
D u q uchur axbarat merkizining mudiri, d u q ning ereb tilidiki bayanatchisi iptixar tengriqutning bildürüshiche, bu qétimqi yighinda d u q kespiy xadimlirining 2024-yilliq xizmetliridin xulase chiqirilghan we 2025-yilliq xizmet teqsimati orunlashturulghan. D u q her yilining béshida kespiy xizmetchilerning yighinini chaqirip kelmekte iken. U sözide, özi mes'ul bolghan d u q uchur axbarat merkizining teshwiqatlirini köp xil tilda téximu küchlük qanat yaydurush toghrisidimu pilanlar tüzülgenlikini tilgha aldi.