Gérmaniyede hökümetning kungzi institutigha meblegh ajritishigha qarshi namayish élip bérildi

Xitayning kungzi institutlirining xitay kommunistik hakimiyitining teshwiqatini qiliwatqanliqi, buning arqisida xitay hakimiyitining chet ellerge “Yumshaq küch” bilen tesir körsitish niyitining bolghanliqigha qarimay, kungzi institutining bir qisim gherb döletlirining yaki sheherlirining yardimige érishiwatqanliqi melum.

Dunya Uyghur qurultiyi bu heqte, yillardin béri kungzi institutining mahiyitini ashkarilap, naraziliq bildürüp kéliwatqan bolup, 21-noyabir küni, gérmaniyening nurnbérg shehiride, sheherlik hökümetning kungzi institutigha her yili ajritiwatqan 37 ming yawruluq mebleghning aldimizdiki yilda qayta ajritilidighanliqigha naraziliq bildürüp, xelq'araliq teshkilatlar bilen birlikte namayish élip barghan.

RFA/Hebibulla Izchi

Bu namayishta söz qilghan dunya Uyghur qurultiyi ijra'iye komitéti mu'awin re'isi erkin zunun bu heqtiki tepsilatlar we köz qarashlirini radiyo anglighuchilar bilen ortaqlashti. U mundaq dédi: “Xitay hökümiti Uyghurlargha élip bériwatqan zulmini 2017-yili, téximu wehshiyleshtürüp, nechche minglighan jaza lagérlirini tesis qilip, üch milyondin artuq bigunah xelqni solap, insaniyetke qarshi her xil jinayetlerni élip bardi. 11 Dölet yuqiriqi wehshiyliklerni ‛irqiy qirghinchiliq‚ dep étirap qildi. Shundaq turuqluq, bawariya ishtati nurnbérg sheherlik hökümetning xitay kommunistlirining teshwiqat orgini bolghan bu institutni téxiche qollishi bimeniliktur, ularning kungzi institutigha meblegh ajritishni derhal toxtitishi zörür”.

Buningdin töt yil burunqi bir xewerde, “Gérmaniye radiyosi” bir doklat élan qilghan bolup, uningda xitay kommunistik hakimiyitining gérmanlar tölewatqan baj puligha tayinip, gérmaniyede özlirining siyasiy teshwiqatlirini keng-kushade élip bériwatqanliqi otturigha qoyulghanidi. Derweqe, gérmaniyening bezi sheherliride kungzi institutigha meblegh ajritiwatqan sheherlik hökümetler hélihem mewjut bolup, gérmaniyening bawariye ishtati nurénbérg shehiri ene shu sheherlerdin biri idi.

Bu heqte radiyomizning téléfon ziyaritini qobul qilghan dunya Uyghur qurultiyi fondining re'isi we qurultay bérlin ishxanisining mudiri gheyur qurban, kungzi institutining arqa körünüshi we qurultayning bu heqte élip barghan pa'aliyetliri heqqide köz qarashlirini otturigha quyup ötti.

Nurnbérg sheherlik hökümet binasining aldida, 21-noyabir küni etigen sa'et 8:30 de bashlinip ikki sa'etke yéqin dawamlashqan namayishta, dunya Uyghur qurultiyi, xeter astidiki milletlerni qoghdash teshkilati we tibetni qoghdash teshkilatlirining rehberliri hökümetke chaqiriq qilip söz qilghan, bu namayishqa nurénbérg sheher etrapida yashaydighan bir qisim Uyghurlarmu qatnashqan.