Ғулҗада бир күндә аз дегәндә 22 кишиниң ачлиқтин өлгәнлики дәлилләнди

Мухбиримиз шөһрәт һошур
2022.09.20
Share on WhatsApp
Share on WhatsApp
Ғулҗада бир күндә аз дегәндә 22 кишиниң ачлиқтин өлгәнлики дәлилләнди Қамал тәдбирлири сәвәблик җан үзгән ғулҗа шәһәр кепәкйүзи йеза аһалиси халмурат өмәр.
Photo: RFA

Иҗтимаий таратқуларда ғулҗада ачлиқтин өлгәнләр һәққидә учурлар тарқалғандин кейин мухбиримиз бу һәқтә ғулҗидин мәлумат сүрүштә қилди. Нәтиҗидә ғулҗа шәһиридә 24 саәт ичидә аз дегәндә 22 кишиниң ачлиқтин өлгәнлики 3 нәпәр хадим тәрипидин дәлилләнди.

Йеқинда торға чиққан бир инкастин мәлум болушичә, ғулҗа шәһәр кепәкйүзи йеза аһалиси халмурат өмәр, қамал тәдбирлири сәвәблик җан үзгән. Дейилишичә у, 7 күн карантин қилинғандин кейин, аилисигә қайтурулмастин токи вә сүйи болмиған адәм яшиғусиз орунға йөткәлгән вә ялғуз қалдурулған. Озуқ-түлүксиз вә беқишсиз қалған халмурат һаятини давамлаштуралмиған.

Биз бу әһвални ениқлаш үчүн ғулҗидики идарә-органларға телефон қилдуқ. Хадимлар халмуратниң өлүм-сәвәби вә җәряни һәққидә мәлумат бәрмигән болсиму, әмма шу күнлүктә ачлиқ сәвәблик өлүм вәқәлириниң йүз бериватқанлиқини йошурмиди.

Шәһәрлик һөкүмәттики хадимлардин бири, алдинқи 24 саәт ичидә шәһәр бойичә өлгән кишиниң қанчә икәнликини сориғинимизда; “20” дәп җаваб бәрди. Биз бу кишиләрниң шәһәрниң қайси йеза яки коча башқармисиға тәвә икәнликини сориғинимизда, уштумтут позитсийәси өзгирип, телефон зияритимизни халимайдиғанлиқини билдүрди вә қайта телефон қилмаслиқимизни ейтти.

Ғулҗа шәһәрлик җиддий қутқузуш бөлүмидики бир хадим, алдинқи бир күндә, йәни 15-сентәбир күни шәһәр бойичә қанчә кишиниң ачлиқтин өлгәнликини сориғинимизда, у “22” дәп җаваб бәрди. Әмма бу хадимму өлгүчиләрдин бирқанчисиниң кимликини сориғинимизда, бу һәқтә тәпсилий мәлумат беришни рәт қилди.

Биз ахирида ғулҗа шәһәрлик сақчи қоманданлиқ мәркизидин 15-сентәбир ачлиқтин өлгәнләр һәққидә һәр хил санларға еришкәнликимизни вә әмәлий санни 100дин артуқ тәхмин қиливатқанлиқимизни билдүрүп, бу тәхминимизниң тоғра яки хаталиқини соридуқ. Бу хадим өлгүчиләрниң у дәриҗидә көп әмәсликини, пәқәт 21 яки 22 икәнликини әскәртти.

Бүгүн, 20-сентәбир түркийәдики муһаҗир абликим аблимит ғулҗидики дадиси аблимит давутниң ачлиқтин өлгәнлики һәққидә хәвәр алған. Униң хәвәр тепишичә, әслидә сақ-саламәт болған дадиси озуқ-түлүк йетишмәсликтин уштумтут ағриған; аилидики пәрзәнтләрниң дадисини давалитиш тәлипи җавабсиз қалған вә нәтиҗидә дохтурханиға апиришқа имкан болмастин 15‏-сентәбир күни өйидә җан үзгән.

Юқирида ғулҗа шәһиридә 15-сентәбир күни бир күн ичидила аз дегәндә 22 кишиниң ачлиқтин өлгәнлики һәққидә аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.