Ghuljada bir künde az dégende 22 kishining achliqtin ölgenliki delillendi

Muxbirimiz shöhret hoshur
2022.09.20
Share on WhatsApp
Share on WhatsApp
Ghuljada bir künde az dégende 22 kishining achliqtin ölgenliki delillendi Qamal tedbirliri seweblik jan üzgen ghulja sheher képekyüzi yéza ahalisi xalmurat ömer.
Photo: RFA

Ijtima'iy taratqularda ghuljada achliqtin ölgenler heqqide uchurlar tarqalghandin kéyin muxbirimiz bu heqte ghuljidin melumat sürüshte qildi. Netijide ghulja shehiride 24 sa'et ichide az dégende 22 kishining achliqtin ölgenliki 3 neper xadim teripidin delillendi.

Yéqinda torgha chiqqan bir inkastin melum bolushiche, ghulja sheher képekyüzi yéza ahalisi xalmurat ömer, qamal tedbirliri seweblik jan üzgen. Déyilishiche u, 7 kün karantin qilin'ghandin kéyin, a'ilisige qayturulmastin toki we süyi bolmighan adem yashighusiz orun'gha yötkelgen we yalghuz qaldurulghan. Ozuq-tülüksiz we béqishsiz qalghan xalmurat hayatini dawamlashturalmighan.

Biz bu ehwalni éniqlash üchün ghuljidiki idare-organlargha téléfon qilduq. Xadimlar xalmuratning ölüm-sewebi we jeryani heqqide melumat bermigen bolsimu, emma shu künlükte achliq seweblik ölüm weqelirining yüz bériwatqanliqini yoshurmidi.

Sheherlik hökümettiki xadimlardin biri, aldinqi 24 sa'et ichide sheher boyiche ölgen kishining qanche ikenlikini sorighinimizda؛ “20” dep jawab berdi. Biz bu kishilerning sheherning qaysi yéza yaki kocha bashqarmisigha tewe ikenlikini sorighinimizda, ushtumtut pozitsiyesi özgirip, téléfon ziyaritimizni xalimaydighanliqini bildürdi we qayta téléfon qilmasliqimizni éytti.

Ghulja sheherlik jiddiy qutquzush bölümidiki bir xadim, aldinqi bir künde, yeni 15-séntebir küni sheher boyiche qanche kishining achliqtin ölgenlikini sorighinimizda, u “22” dep jawab berdi. Emma bu xadimmu ölgüchilerdin birqanchisining kimlikini sorighinimizda, bu heqte tepsiliy melumat bérishni ret qildi.

Biz axirida ghulja sheherlik saqchi qomandanliq merkizidin 15-séntebir achliqtin ölgenler heqqide her xil sanlargha érishkenlikimizni we emeliy sanni 100din artuq texmin qiliwatqanliqimizni bildürüp, bu texminimizning toghra yaki xataliqini soriduq. Bu xadim ölgüchilerning u derijide köp emeslikini, peqet 21 yaki 22 ikenlikini eskertti.

Bügün, 20-séntebir türkiyediki muhajir ablikim ablimit ghuljidiki dadisi ablimit dawutning achliqtin ölgenliki heqqide xewer alghan. Uning xewer tépishiche, eslide saq-salamet bolghan dadisi ozuq-tülük yétishmesliktin ushtumtut aghrighan؛ a'ilidiki perzentlerning dadisini dawalitish telipi jawabsiz qalghan we netijide doxturxanigha apirishqa imkan bolmastin 15‏-séntebir küni öyide jan üzgen.

Yuqirida ghulja shehiride 15-séntebir küni bir kün ichidila az dégende 22 kishining achliqtin ölgenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.