Dangliq gimnastikichi nariman qurbanof dunya musabiqiside yene altun médalgha érishti

Ixtiyariy muxbirimiz oyghan
2023.03.16
Gimnastika-boyiche-dunya-chempiyoni-nariman-qurbanof-milad-karimi.jpg Gimnastika boyiche dunya chémpiyoni nariman qurbanof(ongda) sepdishi milad karimi bilen. 2023-Yil 11-mart, baku, ezerbeyjan.
RFA/Oyghan

9-Martta ezerbeyjan paytexti bakuda bashlinip, 11-martqiche dawam qilghan gimnastika boyiche dunya musabiqisining nöwettiki basquchida Uyghur gimnastikichi nariman qurbanof yene altun médalgha érishti. U yaghach atta oyun körsitish türi boyiche birinchilikni igilidi.

Ammiwi axbarat wasitiliri melumatlirigha qarighanda, bakuda ötken musabiqige en'gliye, xongkong, firansiye, xitay, sérbiye, italiye, ukra'ina qatarliq 48 dölettin 173 tenheriketchi qatnashqan. Erler we ayallar mahirlar gimnastikining besh türi boyiche maharet körsetken. Ezerbeyjanning yashlar we tenheriket ministirlikining bölüm bashliqi élnur mamédofning éytishiche, mundaq musabiqe elde 8-qétim ötüwatqan bolup, bu yil uninggha eng köp gimnastikichi ishtirak qilghan.

11-Martta ghalib chiqqanlarni mukapatlash murasimi bolup ötken. Uningda gimnastikining yaghach atta oyun körsitish türi boyiche qazaqistanliq nariman qurbanof altun médal tapshurup aldi. Ikkinchi orunni irlandiyelik ris mak klénagan, üchinchi orunni albaniyelik matwéy pétrof igiligen.

Bir nechche mertem dunya chémpiyoni, xelq'ara derijidiki tenheriket mahiri nariman qurbanof ziyaritimizni qobul qilip, mundaq dédi: “Bakudiki musabiqe arqa-arqidin ötken üchinchi dunya musabiqisi. Bu jismaniy we psixologiyelik jehettin intayin qiyin boldi. Men tunji qétim mundaq arqa-arqidin üch musabiqige qatnishiptimen. Ulargha teyyarliq men éytip ötkendek, elwette, yaxshi boldi. Biz ilgiri doxagha barghandek komanda bilen qatnashtuq. Milad karimi gimnastikadin erkin oyun körsitish boyiche altun médalgha érishti. Etisi menmu yaghach atta oyun körsitish boyiche altun médal aldim. Elwette, méning bu utuqum qazaqistan gimnastikasining téximu ilgirilishige seweb bolidu, dep oylaymen. Méning riqabetchilirim bolup ilgiriki musabiqilerge qatnashqan barliq küchlük tenheriketchiler hésablinidu. Ular üstidin qazan'ghan ghelibem méning maharitimni yene bir qétim körsetti. Emdi men bir ay dem élip hem meshiqlinip, misirda bolidighan dunya musabiqisining 4-basquchigha qatnashmaqchimen. U yerdimu altun médal élishqa tirishimen.”

Narimanning dadisi, gimnastika boyiche qazaqistanning xizmet körsetken trénér hüsenjan qurbanof ependi mundaq dédi: “Nariman balam kichikidin chaqqan, tirishchan bala bolup östi. U kichikidin gimnastikigha qatnashti we köp tirishti. Nariman 17 yéshida tenheriket mahiri boldi, 20 yéshida dunya chémpiyoni boldi. Mushu yilning ichidila u gérmaniyede mis médal, qatarda altun, mana yéqinda bakuda yene altun médal aldi. Men da'im uning bilen bille boldum. Narimanning utuqliri bizning qazaqistanning utuqliri. U bizning a'ilining, tughqanlarning, pütkül Uyghur xelqining maxtinishi, pexri. Biz buningdin qattiq xushal bolduq. Nariman emdi yene yaxshi teyyarlinip, asiya oyunigha, 2024-yili olimpik oyunigha qatnishidu, dep oylaymen. Men uninggha chong utuq tileymen!”.

Qazaqistan Uyghur yashliri ittipaqining ezasi éfrat nasirof ependi mundaq dédi: “Mushu yéqindila qérindishimiz nariman qurbanof gérmaniyede mis médal, andin qatarda altun médalgha érishti. Buni anglap, bekmu xushal bolduq. Mana emdi ezerbeyjan paytexti baku shehiride ötken gimnastika boyiche dunya musabiqiside yene birinchi orunni igilidi. Nariman qurbanof özining heqiqiy tenheriketchi, heqiqiy dunya chémpiyoni ikenlikini delillidi. Waqitning qisqa bolghinigha qarimay, üch dunya musabiqisige qatniship, yaxshi netije körsetti. Buning barliqi narimanning tirishchanliqi, öz meqsitidin héch qachan qaytmaydighanliqining yarqin ispati, dep oylaymen. Biz dunya musabiqiliride qazaqistanning shenini qoghdighan nariman oxshash Uyghur qiz-yigitlirimizdin da'im pexirlinimiz!”.

Xewerlerdin igilishimizche, nariman qurbanof tunji qétim 2018-yili awstraliyening mélburn shehiride ötken gimnastika boyiche dunya musabiqiside altun médalgha érishkenidi. Bu waqittimu mezkur musabiqige bir qanche döletlerning ataqliq tenheriketchiliri qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.