Gollandiyediki pa'aliyetchi abduréhim ghénining dadisi lagérda jan üzgen

Gollandiyede turushluq pa'aliyetchi abduréhim ghéni ependi 20-séntebir küni özining féysbuk, X  qatarliq ijtima'iy taratqu hésabliri arqiliq, dadisi ghéni xudaberdining yéqinda lagérda jan üzgenliki heqqidiki musibet xewirini tarqatqan.

U özining féysbuk hésabida mundaq dep yazghan: “Xitay tajawuzchi hökümitining sherqiy türkistanda élip bériwatqan irqiy qirghinchiliqi sewebidin, dadam ghéni xudaberdi bilen 2017-yildin buyan héchbir alaqem bolmighan idi. Emma bu yil 7-ayning 6-küni xitay hökümiti saqchiliri akamgha tehdit sélish arqiliq manga téléfon qilghuzup, méni 7-ayning 8-künidin 12-künigiche gollandiyening denhag shehiridiki ‛dunya puqralar sot mehkimisi‚ de fashist shi jinpingning jinayitini sotlashta guwahliq bermeslikim heqqide bésim qilghanda, men téléfonni almighan idim. Bu hiylisi kargha kelmigendin kéyin, xitay hökümiti dadamni jaza lagéridin élip chiqip, akam bilen birge manga nesihet widiyosi ishlep ewetti... Mana emdi dadamning xitay tajawuzchilirining jaza lagérida wapat bolghanliq xewirini anglap könglüm qattiq yérim boldi...”

Abduréhim ghéni ependi dunya puqralar sot mehkimisi (The Court of the Citizens of the World ) 7-ayning 8-künidin 12- künigiche gollandiyening denhag (Den Haag) shehiride xitay kompartiyesining bash sékrétari shi jinpingning jinayetliri üstidin achqan “Xitay soti” gha qatnashqan. U 7-ayning 11-küni xitay hökümiti teripidin tutqun qilin'ghan 19 a'ile ezasi heqqide guwahliq bergen. U yene musibet xewiride tilgha alghan akisi sotqa qatnishishtin burun yollighan dadisining widiyosinimu sotqa sun'ghan.

Abduréhim ghéni ependi bu heqte radiyomizning ziyaritini qobul qildi. U sözide xitay hökümitining Uyghurlargha qaratqan qirghinchiliq siyasitining netijiside dadisining yüzini axirqi qétim körüsh imkaniyitidinmu mehrum qalghanliqini tekitlidi.

Söhbitimizning tepsilatini yuqiriqi ulinishtin anglighaysiz.