Қәшқәр 6-оттура мәктәпниң химийә оқутқучиси ибраһим давутниң 2019-йили лагерда өлгәнлики ашкариланди

Қәшқәр 6-оттура мәктәпниң пенсийәгә чиққан химийә оқутқучиси ибраһим давут қәшқәр тәвәсидә тонулған уйғур зиялийлиридин бири болуп, униң 2019-йили 7-айниң 28-күни тутқун қилинип, шу йили 10-айниң 6-күни тутқун мәзгилидә өлгәнлики һәққидики хәвәр йеқинда ашкариланди.

Әйни чағда ибраһим давутниң тутқун қилиниши вә тутқун мәзгилидә өлүп кәткәнликидин хәвәрдар болған, өз исмини ашкарилашни халимайдиған бирәйләнниң радийомизға ашкарилишичә, мәрһум ибраһим давут 2019-йили қизиниң тойи болуш һарписида йәни 7-айниң 28-күни кечидә тутқун қилинған. Бу күни дәл “йәкән елишқу вәқәси” ниң 5 йиллиқ хатирә күни болуп, кейин у сақчилардин ибраһим давутниң қәшқәр тәвәсидә “җәмийәткә хәвп елип кәлгүчиләр” тизимликидики кишиләр қатарида тутқун қилинғанлиқини билгән.

Униң билдүрүшичә, сақчилар 3 айдин кейин йәни 10-айниң 6-күни мәрһум ибраһим давутниң хитай ичкири өлкилиридә оқуватқан балилири вә башқа уруқ-туғқанлириға униң өлүм хәвирини йәткүзгән вә улардин ибраһим давутниң йүрәк кесили қозғилип өлгәнлики һәққидики испатқа қол қоюшни тәләп қилған. Лекин ибраһим давутниң җәситиниң балилири вә уруқ-туғқанлириға көрситилмәй көмүветилгән болуп, бу иш уларниң қаттиқ наразилиқини қозғиғаникән.

Мәлум болушичә, ибраһим давут хитай даирилири тәрипидин 2000-йиллардин башлап йолға қоюлған қош тиллиқ маарип намидики хитайчә маарипқа қарши наразилиқ билдүргән вә мақалә йезип уйғур тили маарипини тәшәббус қилғанлардин бири икән. У қош тиллиқ маарип йолға қоюлған бу йилларда қәшқәрдә уйғур тилида оқуватқан толуқ оттура мәктәп оқуғучилири үчүн хитай тиллиқ дәрслик материяллирини уйғур тилиға тәрҗимә қилип оқуғучиларни уйғурчә дәрслик материяллири билән тәминләш, қәшқәр 6-оттура мәктәп йенида вә бирқанчә наһийәләрдә “мәрипәт китабханиси” намида китабхана ечип, уйғурчә дәрслик китабларни сетиш, алий мәктәп тәйярлиқ курслири вә тил курслири ечиш қатарлиқ паалийәтләр билән шуғулланған.

Ибраһим давут йәнә йәнә ана тил тәшәббусчиси абдувәли аюпниң оттура мәктәптики оқутқучиси болуп, кейинки чағларда оқуғучиси абдувәли аюп билән һәмкарлишип, қәшқәрдә уйғур ана тили оқутуши үчүн мәбләғ салған икән.

Ана тил тәшәббусчиси абдувәли аюпниң билдүрүшичә, у америкадики оқушини тамамлап, 2011- йили қәшқәргә қайтип кәлгәндин кейин, илгирики оқутқучиси ибраһим давут билән һәмкарлишип “нурхан маарип тәрбийәләш мәркизи” дә инглиз вә түрк тили дәрси өткән.Һәмдә абдувәли аюп қәшқәрдә “уйғур ана тили йәслиси” ни қурған икән.

Абдувәли аюп әпәнди, өзиниң оттура мәктәптики химийә оқутқучиси ибраһим давутниң қәшқәр конашәһәр наһийәси 1-оттура мәктипи вә қәшқәр 6-оттурида ишлигән мәзгилидики иш-излирини әсләп өтти.

Юқиридики аваз улинишидин тәпсилатини аңлайсиләр.