Béyjingdin tutup kétilgen rézhissor ikram nurmemet üstidin ürümchide sot échilghanliqi delillendi

Washin'gtondin muxbirimiz shöhret hoshur teyyarlidi
2023.11.15
ikram-nurmehmet Yash Uyghur rézhissor ikram nurmemet
Open Domain

Xelq'aradiki dangliq axbaratlardin “Muhapizetchi” zhurnilining ötken ayda béyjingda yashawatqan yash Uyghur rézhissor ikram nurmemetning ürümchi saqchiliri teripidin tutup kétilgenliki we sotlinish aldida ikenlikini xewer qilghanidi. Muxbirimizning ürümchige qarita élip barghan téléfon ziyaretliri dawamida ikram nurmemet üstidin 27‏-öktebir küni sot échilghanliqi we tengritagh rayonluq dölet amanliq etritining qolida tutup turuluwatqanliqi delillendi. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

 “Muhapizetchi” zhurnilining bu yil 24‏-öktebirdiki xewiride bayan qilinishiche, ikram nurmemet bu yil 5-ayning 29‏-küni béyjingdiki özi olturushluq tewelikning saqchiliri teripidin chaqirtilghan we ürümchidin kelgen 3 neper saqchigha ötküzüp bérilgen. U béyjingdin élip méngilishning aldida ayali arqiliq uning kiyim-kéchekliri ekeldürülgen. Bu chaghda ayali saqchilardin yoldishining néme üchün ekétiliwatqanliqini sorighinida ürümchi saqchiliri “Tekshürülidighan bir ishi bar” dep jawab bergen؛ béyjing saqchiliri bolsa ikramning “Térrorluqqa alaqidar bir délogha chétilip qalghan” liqi, shuning üchün ekétiliwatqanliqini éytqan. “Muhapizetchi” zhurnilining kimlikini ashkarilashqa bolmaydighan bir menbege asasen yene bayan qilishiche, ikram nurmemetning ürümchidiki anisi ikram ürümchige élip kélin'gen küni ayrodurumgha chiqip oghlini körüwélishqa tirishqan. Emma saqchilar ikramni anisigha yéqinlashturmastin yiraqtin élip mangghan. Anisi oghlining 3 saqchi teripidin yalap élip méngiliwatqan körünüshini widiyogha éliwalghan.

 Ene shu kündin étibaren, ikramning béyjingdiki ayali we ürümchi 2‏-doxturxanida ishleydighan anisi, ikram nurmemet heqqide héchqandaq uchur alalmighan.

 Biz ikram nurmemetning nöwettiki ehwali heqqide melumat élish üchün ürümchidiki alaqidar saqchi organlirigha téléfon qilduq. Saybagh rayonluq saqchi idarisining bir xadimi özining bundaq bir délodin xewiri yoqluqini tilgha élish bilen birlikte, bilgen teqdirdimu bu so'algha jawab bérelmeydighanliqining bisharitini berdi.

 Ikram nurmemet eslide türkiyediki marmara uniwérsitétining sen'et we sénariye kespini 2016-yili püttürüp béyjinggha qaytqan we béyjingda tughulup ösken bir Uyghur qiz bilen toy qilghan. U tyenjinde musteqil élanchiliq we kino-filim rézhissorluqi bilen shughullan'ghan.

 Téléfonimizni qobul qilghan ürümchi sheherlik saqchi idarisining bir emeldari, deslepte ikram nurmemetning délosidin “Tüzük xewiri yoq” liqini tilgha élish arqiliq, eng az melum derijide bilidighanliqini ashkarilidi. Arqidin bolsa, ikram nurmemetning tengritagh rayonluq saqchi idarisi teripidin tutup tekshürülüwatqanliqini tilgha aldi.

“Muhapizetchi” zhurnilining xewiride yene ikram nurmemetning üstidin sot échilish aldida ikenliki, sot künining 25-öktebir ikenliki qeyt qilin'ghan. Téléfonimizni qobul qilghan, emma özini ashkarilashni xalimighan ürümchidiki bir sot xadimi ikram nurmemetning sotining 27-öktebir küni échilghanliqi, sotta ikramning barliq eyiblimilerni ret qilghanliqi, netijide sot hökümining kéler yili 1-aygha qaldurulghanliqini melum qildi. Téléfonimizni qobul qilghan tengritagh rayonluq dölet amanliq etritining bir xadimi, ikram nurmemetning 27-öktebir küni sotlan'ghanliqidin xewiri barliqi, emma, sotning konkrét jeryani, jümlidin ikram nurmemetning eyibnamini néme dep ret qilghanliqi heqqide yuqiri organlardin ruxset almay turup jawab bérelmeydighanliqini éytti.

Melum bolushiche, ikram nurmemet musteqil filim we élan ishlep öz aldigha igilik tiklesh üchün tirishchanliq körsitiwatqan yashlardin bolup, uning hazirgha qeder ishligen filimliri gerche hökümetke qarshi bir meydanda bolmisimu, emma hökümetning teshwiqatigha yandishidighan sho'arlardin xaliy iken. Yene mezkur xadimning déyishiche, sotta ikram nurmemet türkiyede oqughan mezgilidiki turmush we ijtima'iy munasiwetliridin “Mesile” chiqqanliqi üchün eyiblen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.