Uyghur irqiy qirghinchiliqini shiwéytsariye mektepliride tonushturush dawam qilmaqta

18-Öktebir, shiwéytsariyening zug shitatliq ottura mektipide dunya Uyghur qurultiyi sehiye komitéti we shiwéytsariye Uyghur jem'iyiti teripidin yuqiri yilliq sinipning oqughuchilirigha Uyghur irqiy qirghinchiliqini tonushturush élip bérilghan. Pa'aliyette shiwéytsariye Uyghur jem'iyitining sabiq re'isi endili qaraxan mexsus teyyarlan'ghan, Uyghur irqiy qirghinchiliqi eks ettürülgen höjjetlik filim arqiliq tonushturush élip bérip, üch sinipning oqughuchisigha léksiye bergen.

Bu, mezkur mektepning bu heqte orunlashturghan 4-qétimliq pa'aliyiti bolup, shiwéytsariye Uyghur jem'iyiti yillardin béri shiwéytsariyening uniwérsitét, téxnikom we her xil ottura mektepliride bu xil pa'aliyetlerni teshkillep, shiwéytsariyelik yashlargha Uyghur irqiy qirghinchiliqi we xitayning assimilyatsiye siyasetlirini tonushturup kelmekte.

Bu munasiwet bilen oqughuchilargha léksiye sözligüchi endili qaraxan ependini ziyaret qilduq, u bu heqtiki tepsilatlarni radiyo anglighuchilar bilen ortaqlashti.

RFA/Hebibulla Izchi

Shiwéytsariye mektepliride Uyghur irqiy qirghinchiliqini tonushturush shiwéytsariye Uyghur jem'iyitining eng muhim pa'aliyetliridin biri bolup, endili qaraxan bu heqte söz bolghanda, “Yashlar kélechekte döletning siyasetlirige, diplomatiye munasiwetlirige tesir körsitidighan muhim amil. Bular chong bolghanda döletning her qaysi apparatlirida siyasetchi, diplomat, muxbir bolidu we her xil xizmetlerni ishleydu. Biz hazirdin bashlap bulargha teshwiqat élip barsaq we meblegh salsaq kelgüside buning ünümini choqum körimiz” deydu.

Shiwéytsariye mektepliride élip bérilghan bu xil pa'aliyetlerning netijiside, Uyghur mesilisige qiziqidighan oqughuchilar köpeygen bolup, yéqinqi ikki yil ichide ondin jiq aliy mektep oqughuchisining oqush püttürüsh dissértatsiyesi Uyghur irqiy qirghinchiliqi, sherqiy türkistan we xitayning chet ellerdiki basturushliri heqqide yézilghan. Shiwéytsariye Uyghur jem'iyitining re'isi rizwan'ay ilham bu heqte özining qarashlirini radiyo anglighuchilar bilen ortaqliship, shiwéytsariyede pa'aliyet élip bérishta yashlarning rolining muhimliqini tekitlidi.

Bu heqte endili qaraxanning bildürüshiche yene, her qétim mushundaq léksiyeler sözlen'gende balilarning köpi dunyada bundaq bir ishningmu barliqini anglap heyran qalidiken we buni toxtitish üchün biz silerge néme qilip béreleymiz dégen so'alni eng köp soraydiken.

Shiwéytsariye gerche yawropadiki Uyghur eng az dölet bolsimu, emma bu dölet dunya iqtisadining merkizi bolushtek alahidiliki, birleshken döletler teshkilatining bash ishtabining bu dölette bolushidek ewzelliki sewebidin bu dölette yashaydighan Uyghurlar tolimu aktip pa'aliyet élip barmaqta. Shundaqla dunyaning her qaysi jayliridin jenwege kélidighan Uyghur siyasetchiler we aktiplargha yéqindin masliship, her qétim birleshken döletler teshkilatida Uyghur mesilisi yaki xitayning kishilik hoquq mesilisi küntertipke kélidighan waqitlarda namayishlarni teshkillep, birleshken döletler teshkilatida pa'aliyet élip bériwatqan Uyghur teshkilatliri we siyasetchilirini qollap hemdem bolup kelmekte.