Кесәлчан мәһбус мәмәттурсун өмәрниң түрмидә үзүм тасқаватқанлиқи ашкариланди

Вәзийәттин хәвәрдар кишиләрдин бириниң инкас қилишичә, турпан дахийән түрмисидә еғир кесәл һаләттә җаза муддити өтәватқан мәмәттурсун өмәр, йеқинда юртидики кәнт аһалиләр комитетидин кесилини давалаш үчүн дора, селиниватқан әмгики үчүн ғәлвир тәләп қилған. Кәнт аһалиләр комитети мәһбуслар үчүн айрилған мәхсус хираҗәт болмиғачқа униңға дора әвәтип берәлмигән, әмма тәләп қилинған ғәлвирни дәрһал йәткүзүп бәргән. Мухбиримизниң зияритини қобул қилған бир кәнт сақчиси, даириләрниң аталмиш “ғәмхорлуқи” билән кесәл мәмәттурсун өмәрниң түрмидики “йәңгил әмгәк” -қуруқ үзүм тасқашқа селиниватқанлиқини ашкарилиди.

Өткән айдики аңлитишимизда 2009‏-йили камбоджадин қайтурулған уйғурлардин мәмәттурсун өмәрниң турпан дахийән түрмисидә еғир кесәл һаләттә җаза муддити өтәватқанлиқи һәққидә хәвәр бәргән идуқ. Аридин бир ай өткәндә, әйни чағда бизгә бу һәқтә инкас йоллиған вәзийәттин хәвәрдар киши бу қетим мәһбус мәмәттурсун өмәрниң аилиси вә аһалиләр комитетидин дора тәләп қилғанлиқи, әмма аилиси вә кәнтниң керәклик дорини әвәтип берәлмигәнликини, нәтиҗидә мәмәттурсун өмәрниң кесилиниң хәтәрлик басқучқа қарап илгириләватқанлиқини инкас қилди. Инкасчиниң йәнә дейишичә, кәнт сақчиханиси мәмәттурсун өмәрниң қошумчә бир тәлипини дәрһал орундиған, йәни мәмәттурсунниң түрмидики әмгикигә керәк болидиған ғәлвирни әвәтип бәргән.

Телефонимизни қобул қилған мәзкур кәнт сақчиси, йеқинда дахийән түрмисигә берип, мәмәттурсун өмәргә яхши ишләш һәққидә идийәви хизмәт ишләп кәлгәнликини тилға алди. Бу хадим йәнә мәмәттурсун өмәргә керәклик дорини йәткүзүп берәлмигәнликини дәлилләш билән бирликтә, униң түрмидики “йәңгил әмгәк” -қуруқ үзүмни тасқап түргә айриш ишиға селиниватқанлиқини ашкарилиди.

Бу хадим өткән қетимлиқ зияритимиздә, мәмәттурсун өмәрниң кесилини “җякаң”, йәни қалқансиман бәз артерийә қетиш кесили дәп атиған иди. Нөвәттә америкада яшаватқан теббий мутәхәссис мәмәт имин әпәнди, мәзкур кесәлниң аламәт вә ақивәтлири һәққидә тохтилип, вақтида давалаш елип берилмиса, бу кесәлниң бимарға һаятий тәһдит елип келидиғанлиқини тәкитлиди.

 Өткән йили зияритимизни қобул қилған түрмә башқуруш идарисиниң бир хадими дахийән түрмисиниң мәһбусларни қуруқ үзүм вә көктат мәһсулатлирини түргә айриш ишиға селиватқанлиқини ашкарилиған иди.

Һәрқандақ бир кесәлниң бәлгилик дәриҗидә арам алдурулуши керәкликини әскәрткән мәмәт имин әпәнди, мәмәттурсун өмәр дучар болған мәзкур кесәлниң бимарда мағдурсизлиқ пәйда қилидиғанлиқи, шуңа бу хил кесәлни һәрқандақ бир җисманий әмгәккә селишқа болмайдиғанлиқини тәкитлиди.

Юқирида камбоджадин қайтурулуп 20 йиллиқ кесилгән мәһбус мәмәттурсун өмәрниң нөвәттики саламәтлик әһвали һәққидә мәлумат бәрдуқ.