Késelchan mehbus memettursun ömerning türmide üzüm tasqawatqanliqi ashkarilandi

Weziyettin xewerdar kishilerdin birining inkas qilishiche, turpan daxiyen türmiside éghir késel halette jaza mudditi ötewatqan memettursun ömer, yéqinda yurtidiki kent ahaliler komitétidin késilini dawalash üchün dora, séliniwatqan emgiki üchün ghelwir telep qilghan. Kent ahaliler komitéti mehbuslar üchün ayrilghan mexsus xirajet bolmighachqa uninggha dora ewetip bérelmigen, emma telep qilin'ghan ghelwirni derhal yetküzüp bergen. Muxbirimizning ziyaritini qobul qilghan bir kent saqchisi, da'irilerning atalmish “Ghemxorluqi” bilen késel memettursun ömerning türmidiki “Yenggil emgek” -quruq üzüm tasqashqa séliniwatqanliqini ashkarilidi.

Ötken aydiki anglitishimizda 2009‏-yili kambodzhadin qayturulghan Uyghurlardin memettursun ömerning turpan daxiyen türmiside éghir késel halette jaza mudditi ötewatqanliqi heqqide xewer bergen iduq. Aridin bir ay ötkende, eyni chaghda bizge bu heqte inkas yollighan weziyettin xewerdar kishi bu qétim mehbus memettursun ömerning a'ilisi we ahaliler komitétidin dora telep qilghanliqi, emma a'ilisi we kentning kéreklik dorini ewetip bérelmigenlikini, netijide memettursun ömerning késilining xeterlik basquchqa qarap ilgirilewatqanliqini inkas qildi. Inkaschining yene déyishiche, kent saqchixanisi memettursun ömerning qoshumche bir telipini derhal orundighan, yeni memettursunning türmidiki emgikige kérek bolidighan ghelwirni ewetip bergen.

Téléfonimizni qobul qilghan mezkur kent saqchisi, yéqinda daxiyen türmisige bérip, memettursun ömerge yaxshi ishlesh heqqide idiyewi xizmet ishlep kelgenlikini tilgha aldi. Bu xadim yene memettursun ömerge kéreklik dorini yetküzüp bérelmigenlikini delillesh bilen birlikte, uning türmidiki “Yenggil emgek” -quruq üzümni tasqap türge ayrish ishigha séliniwatqanliqini ashkarilidi.

Bu xadim ötken qétimliq ziyaritimizde, memettursun ömerning késilini “Jyakang”, yeni qalqansiman bez artériye qétish késili dep atighan idi. Nöwette amérikada yashawatqan tébbiy mutexessis memet imin ependi, mezkur késelning alamet we aqiwetliri heqqide toxtilip, waqtida dawalash élip bérilmisa, bu késelning bimargha hayatiy tehdit élip kélidighanliqini tekitlidi.

 Ötken yili ziyaritimizni qobul qilghan türme bashqurush idarisining bir xadimi daxiyen türmisining mehbuslarni quruq üzüm we köktat mehsulatlirini türge ayrish ishigha séliwatqanliqini ashkarilighan idi.

Herqandaq bir késelning belgilik derijide aram aldurulushi kéreklikini eskertken memet imin ependi, memettursun ömer duchar bolghan mezkur késelning bimarda maghdursizliq peyda qilidighanliqi, shunga bu xil késelni herqandaq bir jismaniy emgekke sélishqa bolmaydighanliqini tekitlidi.

Yuqirida kambodzhadin qayturulup 20 yilliq késilgen mehbus memettursun ömerning nöwettiki salametlik ehwali heqqide melumat berduq.