Kishilik hoquq pa'aliyetchiliri skéchérs shirkitining Uyghur élidin chékinip chiqishni telep qilmaqta

Amérika Uyghur birleshmisining orunlashturushi bilen amérikaliq Uyghur yashlar we pa'aliyetchiler birlikte bir qanche aydin buyan wirjiniye ishtatining her qaysi rayonliridiki skéchérs dukini aldida namayish élip barghan. Ular mezkur shirketning Uyghur élidiki teminlesh zenjiri Uyghur mejburiy emgikige chétishliq bolghanliqi üchün, ularning Uyghur élidin tamamen chékinip chiqishni telep qilghan.

Namayishchilar namayish jeryanida skéchérs dukinigha kirip-chiqiwatqan xéridarlargha mundaq dégen: “Eger siz skéchérs markiliq ayagh kiygen bolsingiz, ayighingiz xitaydiki zawutlarda mejburiy emgekke séliniwatqan Uyghurlarning qan-yashliri bilen yasalghan bolushi mumkin. Mes'uliyetchan istémalchi bolung. ”

Amérika ana weten xewpsizliki ministirliqi Uyghur mejburiy emgiki mehsulatlirini cheklesh nishanini kéngeytiwatqan bir peytte, amérikaning dangliq ayagh shirkiti skéchérs, bu yil 28-séntebir ürümchide özining tunji ayagh dukinini achqanidi. Eyni waqitta kishilik hoquq pa'aliyetchiliri skéchérs shirkitining bu herikitini, teminlesh zenjiri Uyghur mejburiy emgikige chétishliq shirketlerning Uyghur élidin sodisini chékindürüp chiqishi zörürlükige sel qarighanliq, dep eyibligen.

Amérika Uyghur birleshmisi izchil skéchérs shirkitining Uyghur éli bilen bolghan alaqisini üzüshi kéreklikini telep qilip her xil pa'aliyetlerni élip bériwatqan bolup, amérika Uyghur birleshmisining re'isi elfidar iltebir xanim bu heqte radiyomizgha tepsiliy melumat berdi.

Amérikadiki Uyghur kishilik hoquq qurulushi Uyghurlarning mejburiy emgekke sélinishigha qarshi izchil pa'aliyet élip bériwatqan teshkilatlarning biri. Uyghur kishilik hoquq qurulushining xadimi zubeyre shemsidin xanim radiyomizgha söz qilip, amérikada maqullan'ghan Uyghurlargha munasiwetlik qanunlar ichide “Uyghur mejburiy emgikining aldini élish qanuni” ning nahayiti ünümlük bolghanliqini tekitlidi.

U yene yuqirida tilgha alghan qanunlarning yürgüzülüshi heqqide chüshenche berdi.

Elfidar iltebir xanimning bildürüshiche, ular her qétim skéchérs dukanlirining aldida namayishini axirlashturghandin kéyin, dukanning ichige kérip özlirining namayish qilishtiki meqsiti we skéchérs shirkitige sun'ghan telepliri yézilghan mektupni mes'ul xadimgha bergen.

Ular xétide asasliqi mundaq üch türlük telepni otturigha qoyghan: birinchidin, Uyghur élidiki mejburiy emgekke chétishliq teminligüchiler we zawutlar bilen bolghan alaqini derhal üzüsh. Ikkinchidin, heqiqeten kishilik hoquq we tijaret exlaqigha emel qilsa, ürümchidiki dukinini derhal taqash. Üchinchidin, qattiq we musteqil teminlesh zenjiri tekshürüshini qobul qilip, mehsulatlirining mejburiy emgektin xaliy bolushigha kapaletlik qilish.

Zubeyre shemsidin xanim Uyghur mejburiy emgikige chétishliq shirketlerning xitaydin chékinip chiqishining Uyghur irqi qirghinchiliqini toxtitishtiki roli heqqide toxtaldi.

Skéchérs shirkiti 2021-yili martta Uyghurlar heqqide mexsus bayanat élan qilghan. Ular eyni waqitta bayanatida mundaq dégen: “Skéchérs shirkiti mejburiy emgek heqqidiki doklatqa shundaqla Uyghurlar we shinjang Uyghur aptonom rayonidiki bashqa az sanliq millet ishchilirigha qilin'ghan mu'amililerge qattiq köngül bölidu. Biz soda-sana'et jem'iyetlirining hökümet, sana'et, ishchilar uyushmisi we ammiwi teshkilatlar ara hemkarliq ornitish arqiliq mejburiy emgek mesilisini hel qilish charisini tépish teklipini toluq qollaymiz. Skéchérs shirkiti ilgirikige oxshashla teminligüchilerge qarita tijaret exlaq mizanini qattiq ijra qilip, iqtisadiy teptish we bashqa tekshürüshlerge maslishishqa kapaletlik qilidu.”

Skéchérs shirkitining bu heqtiki inkasini élish üchün ular bilen alaqilishishke térishqan bolsaqmu, ular yazghan élxetlirimizge jawab qayturmidi.