Türkiyedin yurtigha qaytqan muzikant oqughuchi memetyüsüp raxmanning atushta lagérda ikenliki delillendi

Yéqinda ijtima'iy taratqularda türkiyening bülent ejewit uniwérsitétida éléktr inzhénérliqi kespide oquwatqan memetyüsüp raxmanning 2017-yili 1-yanwar küni istanbuldin ürümchige qarap uchqandin kéyinla iz-dériki yoqalghanliqi xewer qilin'ghan. Feysboktiki uchurda uning bir muzika heweskari ikenliki we bir mehel ataqliq sen'etchi abduréhim héytqa shagirt bolghanliqi eskertilgen idi. Muxbirimizning téléfon ziyaretliri dawamida memetyüsüp raxmanning atushning azaq yéza ong'ériq kentige nopusluq ikenliki we nöwette atushtiki yighiwélish lagérida ikenliki delillendi.

Türkiyediki Uyghur ziyaliysi, aktip siyasiy pa'aliyetchi abduweli ayupning bu 15-yanwar küni feysbokta élan qilishiche, memetyüsüp raxman atushning azaq yéza ong'ériq kentidin؛ u 2016-yilning béshida türkiyege kélip, 2016-yili 9 ‏-ayda bülent ejewit uniwérsitétining éléktr inzhénérliqi kespige qobul qilin'ghan. U bir mewsumluq oqushini tamamlighandin kéyin 90 yashliq chong apisini yoqlash üchün, 2017-yili 1-ayning 1-küni istanbul ayrodromidin ürümchige qarap uchqan. Emma shu kündin bashlap u iz-déreksiz ghayib bolghan.

Biz memetyüsüp raxmanning iz-dérikini sürüshte qilip atushtiki bir qisim saqchixanilargha téléfon qilduq. Atush sheherlik pamir yoli saqchixanisi qatarliq bir qisim saqchixana xadimliri bu ehwal heqqide melumat bérishtin özlirini qachurdi. Emma bular atushta türkiyedin qaytip kelgen memetyüsüp raxman isimlik bir oqughuchining mewjutluqini inkar qilmidi.

Abduweli ayupning feysbokta tonushturushiche, memetyüsüp raxman 1995-yili, 27-may küni tughulghan؛ u bir heweskar muzikant bolup, bir mehel ataqliq sen'etkar abduréhim héytqa shagirt bolghan. U türkiyede ishlen'gen “Tirilish ertughrul” namliq köp qisimliq téléwiziye filimining kirishtürme muzikisini dutar bilen orundap, türkiyede bir qisim jama'et ichide diqqet qozghighan. Melum bolushiche, türkiyede aliy mektep imtihanigha qatniship birqanche uniwérsitéttin teklipname tapshuruwalghan memetyüsüp raxman, bülent ejwét uniwérsitétini talliwalghandin kéyin, pütün diqqiti bilen oqushqa bérilgen we türkiyediki muhajir Uyghurlar teripidin élip bérilghan barliq pa'aliyetlerdin yiraq turghan. U yurtigha qaytishning aldida enqerediki xitay elchixanisigha bérip alaqidar resmiyetlirini terjime qilduruwalghan؛ yeni yurtigha qaytqandin kéyin awarichilikke uchrimasliq we saq-salamet qaytip kélishning tirishchanliqini körsetken. Shundaqtimu, u milyonlighan Uyghurlar qatarida, yighiwélish lagérigha ekétilishtin qutulalmighan. Axiri téléfonimizni qobul qilghan azaq yéziliq saqchixana xadimi memetyüsüp raxmanning lagérdiki ehwalini rayon saqchisi iminjanning bilidighanliqini ashkarilash arqiliq, uning lagérda ikenlikini delillidi. Biz uningdin memetyüsüp raxmanning a'ile ehwalini sorighinimizda, u bu so'alghimu memetyüsüp raxmanning délosigha mes'ul bolghan iminjanning bilidighanliqini tekrarlidi.

Hörmetlik radi'o anglighuchilar saqchi xadimliri memetyüsüp raxmanning tutulush sewebi heqqide melumat bérelmidi. Abduweli ayupning memetyüsüp raxmanning iz-déreksizliki heqqidiki yazmisida, uning tutqundiki sen'etkar abduréhim héytqa shagirt bolghanliqining bahane qilin'ghanliqi éhtimalliqi ilgiri sürülgen.