Lagér shahidi qaster musaqan qazaqistanda namelum kishiler teripidin urup éghir yarilandurulghan

Qazaqistandiki lagér shahiti qaster musaqan 2023-yili 12-ayning 22-küni jüme namelum kishilerning hujumigha uchrap éghir yarilandurulghandin kéyin tartilghan süret. 2023-Yili 22-dékabir, qazaqistan

Qazaqistandiki “Ata yurt” teshkilatning  nöwette gérmaniyede yashawatqan re'isi erbol döletbekning radiyomizgha inkas qilishiche, qazaqistandiki lagér shahidi qaster musaqan, ötken jüme namelum kishilerning hujumigha uchrap éghir yarilandurulghan. Atayurt teshkilatining mes'ul xadimi neq meydan'gha yétip kélip, jiddiy ehwalni jiddiy qutquzush ornigha  we saqchilargha melum qilghan. Qaster musaqan doxturxanigha ekilip tekshürülginide 4 tal qowurghisining sun'ghanliqi melum bolghan.

 Bügün téléfonimizni qobul qilghan qaster musaqan shu küni béshidin ötkenler heqqidiki so'alimizgha mundaq jawab berdi:

So'al: chong bir kélishmeslikke uchrapsiz?

Jawab: shundaq22 ‏-chésla idi, namelum 4 kishi urup ketti.

So'al: nede idingiz?

Jawab : bir ashxanida tamaq yewatqan. Ariliqta hajetxanigha kétiwatsam, birsi qolumdin tartip “Tamaqning pulini bériwet” dédi, men “Pulni ashxanining igisige bérimen” désem,  “Igisi men bolimen” depla urup ketti. Yene 3 kishimu üstümge yopurulup keldi. Héch birsini men körüp baqmighan....Méni urup yatquzuwetkendin kéyin sirtqa chiqip ketti.

So'al: néme bilen urdi?

Jawab : urdi, tepti, dessidi, birlirining qolida bilyart tayiqi bar idi, shuning bilenmu urdi.

So'al: qeyerliringiz zeximlendi?

Jawab:  4 tal qowurgham sunup ketti, bir tal chishimning yérimi sunup ketti, yene bir tal chishim lingship qaldi. Yüz-közüm yéghir...

So'al: andin qandaq boldi?

Jawab: jiddiy qutquzush bilen doxturxanigha apirildim. Tekshürülgendin kéyin, qolumda resmiyetlirim bolmighachqa, balnistqa almidi. Öyde dawaliniwatimen.

So'al: ashxanining xojayinigha démidingizmu, bu kimler dep?

Jawab : ashxana üch qewetlik ashxana idi. Ashxana igisi  “Körmey qaptuq, bizge némishqa derhal démiding, ular bizning akilirimiz bolidu” dédi.

So'al: démek ashxana sahibi sizni urghuchilar bilen yéqinchiliqi barliqini yoshurmidi.

Özini ashkarilashni xalimighan guwahchilardin birining bayan qilishiche, qaster musaqanni urghan kishilerning bir qisim yéqinliri qaster we uning yéqinlirigha téléfon qilip, sun'ghan erzidin waz kéchishni, bolmisa hayatigha xeter yétidighanliqini éytqan.  Melum bolushiche, qaster musaqan lagér heqqidiki guwahliqlirini toxtatmay kéliwatqan we 20 künning aldida bir xelq'ara axbarat orginining ziyaritini qobul qilghan iken.