Maralbéshi baziridiki tumaqchi haji'axun we ayali mexpiremxan tumshuq türmiside jan üzgen

Maralbéshining tumshuq türmisidin roza héytning aldida bir türküm kishilerning jesiti chiqqanliqi heqqidiki inkas üstide élip bériwatqan éniqlashlirimiz dawamida, eslide maralbéshi bazirida tumaqchiliq bilen tirikchilik qiliwatqan we 2017 ‏-yildiki chong tutqundin kéyin késiwétilgen haji'axun we mexpiremxan isimlik er-ayalning jaza mudditini ötewatqan tumshuq türmiside jan üzgenliki delillendi.

Maralbéshiliq bir muhajir ötken ayda maralbéshidiki tumshuq türmisidin roza héyttin bir heptiche burun abdughéni qadir qatarliq bir türküm kishilerning jesiti chiqqanliqi we bu jesetlerning mexpiy shekilde a'ile tawabi'atlirigha tarqitilghanliqini inkas qilghan idi. Ötken heptidiki éniqlashlirimiz dawamida bu tarqitilghan jesetlerdin birsining memettursun metniyaz isimlik motsiklit rémontchisi ikenliki aydinglashqan idi. Biz bu hepte maralbéshigha qarita élip barghan téléfon ziyaretlirimiz dawamida, mezkur jesetlerning kimliki we ölüm sewebliri heqqide herqaysi saqchi orunliridin melumat soriduq.

Maralbéshidiki bir saqchixana bashliqi roza héytning aldida, tumshuq türmisidin bir türküm mehbuslarning jesiti chiqqanliqini inkar qilmidi. U bu xil uchurlarni mexpiy tutush heqqide mexsus höjjet barliqini tekitlep, bu heqte nahiyelik saqchi idarisidiki mes'ul xadimlardin ehwal igilishimizni tewsiye qildi. Tumshuq shehiridiki 54‏-polk (tu'en) saqchixanisining xadimi, roza héytning aldida tumshuq türmisidin bir türküm kishilerning jesiti chiqqanliqini delillidi, emma jesetlerning sani we kimlikliri heqqide melumat bermidi. Uning déyishiche, u tumshuq türmisidin jesetlerni élip chiqishqa bu saqchixanining bashliqi we yene bir xadim bilen birlikte barghan. Shu künlerde pütün saqchixanilar bixeterlik tedbirlirini alahide kücheytken. Bolupmu jeset igisining a'ile qorusi we mehellisi nuqtiliq közitilgen we nazaret qilin'ghan. Emma bu xadimmu jesetlerning kimlikliri we ölüm sewebi heqqide melumat bérelmidi.

Téléfonimizni qobul qilghan, emma özini ashkarilashni xalimighan xadimlardin biri, tumshuq türmisidin bir türküm mehbuslarning jesiti chiqqanliqidin özining xewiri barliqi, emma buning yéngi bir ehwal emeslikini, tumshuq türmiside pewqul'adde adem köp bolghachqa, bezide her küni bezide heptide bir qétim jesetler élip chiqilip, mexpiy shekilde tarqitilidighanliqini bayan qildi. Uning bildürüshiche, bu qétimqisi roza héytning aldida bolghachqa, ehwalni toluq yoshurush mumkin bolmighan, hetta jem'iyette tumshuq türmiside bir türküm mehbuslarning tamaqtin zeherlinip ölgenliki heqqide gep-söz tarqalghan. U bu uchurning toghra-xataliqigha özimu bir nerse déyelmeydighanliqini eskertish bilen birlikte, jesetlerdin birining maralbéshi baziridiki tonulghan bir tumaqchi kishi ikenlikini ashkarilidi.

Biz bu yip uchigha asasen maralbéshi bazar ichidiki bir saqchixanigha téléfon qilduq. Téléfonimizni qobul qilghan xadim, bu saqchixana tewelikidiki tonulghan tumaqchining haji'axun isimlik kishi ikenliki, uning mexpiremxan isimlik ayali bilen birlikte türmide jan üzgenlikini delillidi. Melum bolushiche, 70 we 65 yashlardiki bu bir jüp er-ayal, 2017‏-yili tutqun qilinip, 2019‏-yili késiwétilgen iken.

***

Erkin asiya radiyosi Uyghur bölümi muxbirliri qiyin ehwalda meshghulat qilidu, shunga bu xewerni ishlesh jeryanida muxbirlirimizning bixeterlikini közde tutup, ularning erkin asiya radiyosi bilen bolghan munasiwitini ashkarilimasliqni talliduq.