Kambodzhadin qayturulghan memet'eli rozining 37 yéshida yeken türmiside jan üzgenliki delillendi

Washin'gtondin muxbirimiz shöhret hoshur teyyarlidi
2025.01.19
kambodzha-uyghur Kambodzhadin qayturulghan Uyghurlarning bir qismi. 2009-Yili 11-ay, kambodzha.
RFA/Shohret Hoshur

 Ashkarilinishiche, 2009-yili dékabirda kambodzhadin qayturulghan Uyghurlardin memet'eli rozi, ilgiri qatnash weqesige yoluqup bilikige 3 parche tömür sélin'ghan bolup, bu tömür parchiliri waqtida éliwétilmigechke, bilikide sésish peyda bolghan we bu sésish yürekke qeder tesir qilip, 2014-yili 37 yéshida türmide jan üzgen. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

2009-Yili kambodzhadin qayturulghan Uyghurlarning uruq-tughqanliridin bolghan we nöwette türkiyede yashawatqan ayshemgül xanim, ötken yili radiyomizgha yollighan inkasida kambodzhadin shu qétimda qayturulghanlardin 2 nepirining türmide jan üzgenliki, bulardin birining memet'eli rozi ikenlikini melum qilghanidi. Biz bu uchurning toghra-xataliqini aydinglashturush üchün, memet'eli rozi jaza ötewatqan qeshqer wilayetlik türme, yeni yeken türmisige téléfon qilduq. Alaqidar bir xadim memet'eli rozining ölüm xewiri heqqidiki so'alimizgha müjmel we éniqsiz jawab berdi, emma xewerni keskin halda ret qilalmidi.

Kambodzhadin qayturulghan Uyghurlarning bir qismi. 2009-Yili 11-ay, kambodzha.
Kambodzhadin qayturulghan Uyghurlarning bir qismi. 2009-Yili 11-ay, kambodzha.
UHRP

 Xewer arxiplirimizdin melum bolushiche, memet'eli rozi yéngisar nahiyesining sétil yézisida tughulghan we ghulja shehiride chong bolghan bolup, u ghulja, ürümchi sheherliride we xitayning bir qisim ichkiri sheherliride ashpez-nawayliq bilen shughullinip tirikchilik qilip kelgen. U, 2009-yilining béshida gu'angjuda nawayliq qiliwatqan mezgilide qatnash weqesige yoluqup, bilikige 3 parche tömür sélin'ghan, doxturning diyagnozida tömür parchisining 10 ay ichide éliwétilishi kérekliki, undaq bolmighanda hayatigha xeter yétidighanliqi qeyt qilin'ghan. Bilikide tömür bar halette kambodzhagha seper qilghan memet'eli rozi, xitaygha qayturulghandin kéyin, yeken türmisidiki mezgilide, bilikidiki 3 parche tömürning éliwétish waqti kelgenlikini türme da'irilirige 3 qétim melum qilghan we dawalinishni telep qilghan. Emma da'iriler, bu telepke perwa qilmighan. Bu ehwal eyni chaghdiki éniqlashlirimizda, türme bashqurush xadimliri teripidin delillen'genidi.

 Türkiyediki muhajir ayshemgül xanimning déyishiche, memet'eli rozining ayali gülbahar sadiq, yoldishining bilikidiki tömürni alghuzuwétish heqqide ürümchi we qeshqerdiki alaqidar saqchi organlirigha bérip telep sun'ghan, hetta iqtisadiy chiqimni öz üstige alidighanliqini bildürgen bolsimu, héchqandaq netijige érishelmigen, u ghuljidin qeshqerge 4 perzentini élip, 3 qétim kélipmu yoldishi bilen körüshüsh pursitige érishelmigen. Déyilishiche, memet'eli rozining ayali muraji'et sun'ghanda, tömürning élinidighan waqti muddettin 10 ay éship ketken bolup, shuningdin kéyin da'irilerning memet'eli rozining bilikidiki tömürni kéchikip bolsimu éliwetken yaki éliwetmigenliki melum emes.

 Ayshemgül xanimning déyishiche, memet'eli rozining uruq-tughqanlirining köpinchisi yéngisarning sétil yézisida olturushluq bolup, uning ölüm xewiri ene shu uruq-tughqanlirigha yetküzülgen. Ayali gülbahar sadiqmu yoldishining ölüm xewirini yoldishining yéngisardiki tughqanliridin uqqan. Sétil yézisidin téléfonimizni qobul qilghan bir amanliq mudiri, memet'eli rozining türmide ölgenlikini eng deslep jem'iyettin uqqanliqi, arqidin uning uruq-tughqanliri bilen söhbetlishish jeryanida xewer tapqanliqini ashkarilidi. Bu amanliq mudiri memet'eli rozini yürek késili bilen öldi dep anglighan؛ emma bu yürek késilining bilektiki éliwétilmigen yaki kéchikip élin'ghan 3 parche tömür bilen alaqisi bar-yoqluqi heqqide melumati bolmighan.

Bu mudirning bayanliridin delillinishiche, memet'eli rozi yeken türmiside 2014-yilining may éyida 37 yéshida jan üzgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.