Norwégiye we gollandiyediki Uyghur jama'iti xitaygha qarshi naraziliq namayishi ötküzdi

Gollandiye dam meydanidiki namayish körünüshi. 2024-Yili 29-séntebir, amstérdam

28-29-Séntebir künliri norwégiye, gollandiye qatarliq yawropa döletliridiki Uyghur jama'iti xitayning 10-ayning 1-künidiki dölet bayrimigha lenet oqush yüzisidin muddettin burun naraziliq namayishliri ötküzgen.

Norwégiyediki Uyghur jama'iti élip barghan namayish 28-séntebir (shenbe) küni norwégiye parlamént binasi aldida ötküzülgen bolup, bu namayishqa 50 din köp kishi qatnashqan. Norwégiye Uyghur komitétining re'isi xelchem memtiminning bildürüshiche, namayish aldi bilen sherqiy türkistanning istiqlal marshi bilen bashlan'ghan. Namayishchilar xitaygha qarshi jarangliq sho'arlarni towlap, etrapni lerzige keltürgen.

RFA/Hebibulla Izchi

Téléfon ziyaritimizni qobul qilghan norwégiye Uyghur komitétining re'isi xelchem memtimin, bu qétimqi namayishning meqsiti we namayishning jeryani toghriliq melumat bérip ötti.

29-Séntebir (yekshenbe) küni gollandiye paytexti amstérdamdiki dam meydanida siyasiy pa'aliyetchi abduréhim ghénining teshkillishide xitaygha qarshi naraziliq namayishi ötküzülgen. Bu namayishqa gollandiyediki xitay démokratik teshkilatlirimu qatnashqan.

“Xitayning dölet bayrimi Uyghurlar üchün matem künidur” dédi abduréhim ghéni téléfon arqiliq radiyomiz ziyaritini qobul qilghanda. U sözining dawamida namayishning jeryani heqqidiki tepsilatlarni radiyo anglighuchilar bilen ortaqlashti.

RFA/Hebibulla Izchi

Bu namayishqa dunya Uyghur qurultiyining gollandiyediki wekilliri, gollandiyediki bir qisim Uyghur jama'iti we gollandiyediki lagér shahiti qelbinur sidiq qatarliqlar qatnashqan. Shahiti qelbinur sidiq xanim, gollandiyede gerche on minggha yéqin Uyghur siyasiy panahliq bilen yashawatqan bolsimu, emma bu qétimqi namayishqa kelgen ademlerning intayin azliqidin epsuslan'ghanliqini؛ xitayning bir qisim Uyghurlargha yeng ichide qaratmiliq siyaset qollinip, ularni weten'ge qaytip tughqan yoqlashqa yaki sayahet qilishqa yol quyushi netijiside, chet ellerde xitaygha qarshi pa'aliyetlerge qatnishidighan Uyghurlarning sanida körünerlik aziyish boluwatqanliqini bildürdi.

RFA/Hebibulla Izchi

U yene, buning xitayning Uyghur irqiy qirghinchiliqini yoshurush we inkar qilish pilanining bir parchisi ikenlikini, öz dewride xitayning zulumidin qéchip yawropa döletlirige qéchip kelgen we erkin dunyada yashawatqan Uyghurlarning emdilikte öz wijdanigha xilap halda xitayning bu pilanigha yantayaq bolup bérishining tarix hergiz kechürmeydighan bir jinayet ikenlikini tekitlep ötti.

Gollandiyede ötküzülgen bu qétimliq namayish jeryanida “Sherqiy türkistan'gha musteqilliq! ” , “Sherqiy türkistan'gha höriyet!”, “Uyghur irqiy qirghinchiliqi toxtitilsun!”, “Shi jinping térrorist!” dégendek sho'arlarni towlashqan.