Norwégiyede ottura mektep oqughuchilirigha Uyghur irqiy qirghinchiliqi tonushturulghan

Norwégiye Uyghur komitéti re'isi xelchem memtimin(ongdin birinchi) we Uyghur qizi munire yaqup(ongdin üchinchi) lar Uyghurlarning weziyitini tonushturush pa'aliyetni birlikte teshkilligen oqughuchilar wekilliri bilen. 2024-Yili 5-dékabir. Norwégiye.

5-Dékabir, norwégiye Uyghur komitéti norwégiye berum kommunasining merkizi sandéwikadiki ottura mektepte Uyghur irqiy qirghinchiliqi, xitayning sherqiy türkistandiki jaza lagérliri, Uyghurlarning qirghinchiliqqa uchrash jeryani we qirghinchiliqning tarixy arqa körünüshi heqqide doklat bergen.

RFA/Hebibulla Izchi

Bu munasiwet bilen, norwégiye Uyghur komitéti re'isi xelchem memtiminni ziyaret qilduq, u radiyomiz arqiliq bu qétimqi pa'aliyetni teshkilleshning meqsiti heqqidiki tepsilatlarni radiyo anglighuchilar bilen ortaqlashti.

Bu pa'aliyette diqqet tartqan nuqtilardin biri, bu pa'aliyetni teshkilligen sandéwikadiki ottura mektepning oqughuchiliri özliri intérnéttin alghan uchurlar boyiche sherqiy türkistandiki irqiy qirghinchiliq, xitayning jaza lagérliri eks ettürülgen tam gézitlirini layihelep mektepning karidor tamlirigha asqan bolup, bu yighin qatnashquchilirining alahide diqqitini tartqan.

RFA/Hebibulla Izchi

Bu pa'aliyetke qatnashqan oqughuchilar Uyghurlarning hazirqi ehwaligha nahayiti échin'ghanliqini, Uyghurlargha hésdashliq qilidighanliqini, her qandaq shekildiki irqiy qirghinchiliqqa qarshi turidighanliqini we her qachan Uyghurlarning yénida ikenlikini bildürüshken. Bu heqte yash istudént, norwégiyediki Uyghur qizi munire yaqup, bu yighin heqqidiki tesiratlirini bayan qildi.

RFA/Hebibulla Izchi

Norwégiye Uyghur komitéti re'isi xelchem memtimin we norwégiyediki Uyghur qizi, istudént munire yaqupning bir sa'etke yéqin dawamlashqan doklatidin kéyin, mektep oqughuchiliri bes-beste Uyghur irqiy qirghinchiliqi we jaza lagérliri heqqide so'allar sorashqan. Xelchem memtimin oqughuchilarning eng köp sorighan so'alliri heqqidiki tepsilatlarnimu radiyo anglighuchilar bilen ortaqlashti.

RFA/Hebibulla Izchi

Nöwette norwégiyede texminen alte ming etrapida Uyghur yashaydighan bolup, norwégiye Uyghur komitéti yillardin béri norwégiyede Uyghur irqiy qirghinchiliqini tonushturush we Uyghur yashlirini terbiyelesh, xitayning qirghinchiliq jinayetlirini pash qilishta aktip pa'aliyet élip barmaqta. Bolupmu yéqinqi yillardin buyan komitét ezaliri her qaysi ottura mekteplerde Uyghur irqiy qirghinchiliqini tonushturup, yerlik yashlarning sherqiy türkistan dawasigha bolghan qiziqishi we yardimini qolgha keltürmekte.