Сақчи нурмәмәт йүсүпниң "өзини өлтүривалған" әмәс, бәлки қейин-қистақтин өлгәнлики ашкариланди

Мухбиримиз шөһрәт һошур
2021-11-30
Share
charlash-uyghur-saqchi.jpg Коча чарлаватқан уйғур сақчи. 2015-Йили 17-авғуст, ақсу.
AFP

Өткән айда өрүмчи ат бәйгә мәйдани сақчиханисиниң хадими нурмәмәт йүсүпниң икки ай аввал "өзини өлтүривалғанлиқи" һәққидә учур кәлгән иди.

Ениқлашлиримиз давамида алақидар сақчи хадимлири бу учурниң тоғрилиқини тилға алған иди. Сақчи нурмәмәтниң өлүм сәвәби һәққидә йәниму илгириләп елип барған ениқлашлиримиз давамида, нурмәмәт йүсүпниң "өзини өлтүривалған" әмәс, бәлки қейин-қистақтин өлгәнлики мәлум болди.

Өткән айда радийомизға кәлгән бир инкаста, үрүмчи ат бәйгә мәйдани сақчиханисниң хадими нурмәмәт йүсүпниң "җинайәтчини қанат астиға елиш" гумани билән тутқун қилинғанлиқи вә сорақ давамида "өзини өлтүривалғанлиқи" һәққидә учур кәлгән иди. Шу чағдики ениқлашлиримиз давамида, нурмәмәт йүсүпниң өлүм хәвири дәлилләнгән болсиму, әмма өлүм сәвәби ениқ айдиңлашмиған иди.

Бу һәқтә йеқинда радийомизға кәлгән бир язма инкастиму нурмәмәт йүсүп сорақ қилинииш җәрянида қейин-қистақ әсваби хата тәңшилип қалғанлиқи үчүн, әсвәпниң зәхмиси күтүлгәндин чоң болуп кәткәнлики вә шу зәхмидин өлгәнлики қәйт қилинған. Әмма инкаста бу қейин-қистақ әсвабиниң қандақ бир әсвап икәнликни вә нурмәмәтниң бәдининиң қайси қисмини зәхмиләндүргәнлики қәйт қилинмиған.

Биз үрүмчи уланбайдики сақчихана вә қамақхана хадимлириға телефон қилип, нурмәмәт йүсүпниң өлүм сәвәби һәққидә мәлумат соридуқ. Сақчилардин бири нурмәмәт йүсүпниң өлүм сәвәбиниң "дөләт мәхпийәтлики" икәнлики, буни ашкарилимаслиқ һәққидә мәхсус уқтуруш тарқитилғанлиқини тилға алди. Радийомизға кәлгән йеиқинқи инкаста йәнә нурмәмәтниң уланбайдики қамақханида җан үзгәнлики тилға елинған.

Инкаста йәнә нурмәмәтни сорақ қилған сақчилардин бири хәмит ислик дөләт аманлиқ сақчиси икәнлики вә униңға мәзкур сорақта қейин-қистақни ашуруп қолланғанлиқи үчүн сақчи идариси ичидә интизам җазаси берилгәнлики әскәртилгән. Биз уланбай, қарлиғачлиқ вә ат бәйгә мәйдани сақчиханилириға телефон қилип, хәмит исимлик бу сақчи һәққидә мәлумат соридуқ. Хадимлардин бири нурмәмәт йүсүп қамақханида җан үзгән күни кечидә сақчи идарисиға чақиртилғанлиқи вә нөвәттә турғузулғанлиқи вә азрақ вақиттин кейин өйлиригә қайтишқа буйрулғанғлиқи, йәни нурмәмәт йүсүпниң нәқ мәйдандики һалитидин хәвәрләндүрүлмигәнликини ейтти. Бу хадим йәнә нурмәмәтни сорақ қилғучилар арсида хәмит исимлики бир сақчиниң барлиқини тилға елиш билән бирликтә, хәмитниң йеқинқи 4 йилда актип хизмәт қилған бир хадим икәнлики, әмма йеқинда униңға берилидиған бир мукапатниң бикар қилинғанлиқини баян қилди. Униң бу баянлири арқилиқ, радийомизға кәлгән инкастики униң қейин-қистақни ашуруп қоллинип нурмәмәт йүсүпниң җениға замин болғанлиқи вә бу сәвәбтин интизам җазасиға учриғанлиқи тоғрисидики учурни вастилиқ һалда дәлиллиди.

Һөрмәтлик радийо аңлиғучилар, сақчи нурмәмәт йүсупниң өлүми һәққидә илгирики ениқлашлиримиз давамида униң лагерда вәзпә өтәватқан мәзгилидә "бир тутқунға һессидашлиқ қилғанлиқи", йәни камирда қан қусуватқан тутқунниң еғиз-бурнини сүртүп қойғанлиқи үчүн "җинайәтчини қанат астиға елиш" гумани билән тутқун қилинғанлиқи мәлум болған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт