Saqchi nurmemet yüsüpning "Özini öltüriwalghan" emes, belki qéyin-qistaqtin ölgenliki ashkarilandi

Muxbirimiz shöhret hoshur
2021-11-30
Share
charlash-uyghur-saqchi.jpg Kocha charlawatqan Uyghur saqchi. 2015-Yili 17-awghust, aqsu.
AFP

Ötken ayda örümchi at beyge meydani saqchixanisining xadimi nurmemet yüsüpning ikki ay awwal "Özini öltüriwalghanliqi" heqqide uchur kelgen idi.

Éniqlashlirimiz dawamida alaqidar saqchi xadimliri bu uchurning toghriliqini tilgha alghan idi. Saqchi nurmemetning ölüm sewebi heqqide yenimu ilgirilep élip barghan éniqlashlirimiz dawamida, nurmemet yüsüpning "Özini öltüriwalghan" emes, belki qéyin-qistaqtin ölgenliki melum boldi.

Ötken ayda radiyomizgha kelgen bir inkasta, ürümchi at beyge meydani saqchixanisning xadimi nurmemet yüsüpning "Jinayetchini qanat astigha élish" gumani bilen tutqun qilin'ghanliqi we soraq dawamida "Özini öltüriwalghanliqi" heqqide uchur kelgen idi. Shu chaghdiki éniqlashlirimiz dawamida, nurmemet yüsüpning ölüm xewiri delillen'gen bolsimu, emma ölüm sewebi éniq aydinglashmighan idi.

Bu heqte yéqinda radiyomizgha kelgen bir yazma inkastimu nurmemet yüsüp soraq qilini'ish jeryanida qéyin-qistaq eswabi xata tengshilip qalghanliqi üchün, eswepning zexmisi kütülgendin chong bolup ketkenliki we shu zexmidin ölgenliki qeyt qilin'ghan. Emma inkasta bu qéyin-qistaq eswabining qandaq bir eswap ikenlikni we nurmemetning bedinining qaysi qismini zexmilendürgenliki qeyt qilinmighan.

Biz ürümchi ulanbaydiki saqchixana we qamaqxana xadimlirigha téléfon qilip, nurmemet yüsüpning ölüm sewebi heqqide melumat soriduq. Saqchilardin biri nurmemet yüsüpning ölüm sewebining "Dölet mexpiyetliki" ikenliki, buni ashkarilimasliq heqqide mexsus uqturush tarqitilghanliqini tilgha aldi. Radiyomizgha kelgen yéiqinqi inkasta yene nurmemetning ulanbaydiki qamaqxanida jan üzgenliki tilgha élin'ghan.

Inkasta yene nurmemetni soraq qilghan saqchilardin biri xemit islik dölet amanliq saqchisi ikenliki we uninggha mezkur soraqta qéyin-qistaqni ashurup qollan'ghanliqi üchün saqchi idarisi ichide intizam jazasi bérilgenliki eskertilgen. Biz ulanbay, qarlighachliq we at beyge meydani saqchixanilirigha téléfon qilip, xemit isimlik bu saqchi heqqide melumat soriduq. Xadimlardin biri nurmemet yüsüp qamaqxanida jan üzgen küni kéchide saqchi idarisigha chaqirtilghanliqi we nöwette turghuzulghanliqi we azraq waqittin kéyin öylirige qaytishqa buyrulghan'ghliqi, yeni nurmemet yüsüpning neq meydandiki halitidin xewerlendürülmigenlikini éytti. Bu xadim yene nurmemetni soraq qilghuchilar arsida xemit isimliki bir saqchining barliqini tilgha élish bilen birlikte, xemitning yéqinqi 4 yilda aktip xizmet qilghan bir xadim ikenliki, emma yéqinda uninggha bérilidighan bir mukapatning bikar qilin'ghanliqini bayan qildi. Uning bu bayanliri arqiliq, radiyomizgha kelgen inkastiki uning qéyin-qistaqni ashurup qollinip nurmemet yüsüpning jénigha zamin bolghanliqi we bu sewebtin intizam jazasigha uchrighanliqi toghrisidiki uchurni wastiliq halda delillidi.

Hörmetlik radiyo anglighuchilar, saqchi nurmemet yüsupning ölümi heqqide ilgiriki éniqlashlirimiz dawamida uning lagérda wezpe ötewatqan mezgilide "Bir tutqun'gha héssidashliq qilghanliqi", yeni kamirda qan qusuwatqan tutqunning éghiz-burnini sürtüp qoyghanliqi üchün "Jinayetchini qanat astigha élish" gumani bilen tutqun qilin'ghanliqi melum bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet