Xitay da'iriliri ürümchi ot aptide ölgenlerning sani we kimlikini “Dölet mexpiyetliki” qatarida sir tutmaqta

Muxbirimiz shöhret hoshur
2022.12.01
Share on WhatsApp
Share on WhatsApp
urumchi-ot-apiti-ziyankeshlikke-uchrighuchilar-2.jpg Ürümchi 24-noyabir ot apitide qaza qilghanliqi qeyt qilin'ghan Uyghur ana we 3 perzenti. Resim ijtima'iy taratqulardin élindi, radi'omiz teripidin toghriliqi delillenmidi.
Social Media

Ürümchide ot apiti yüz berginige bir hepte bolup qalghan bolsimu, emma xitay da'iriliri weqede ölgenlerning kimliki, bolupmu ularning Uyghur ikenliki heqqide héchqandaq melumat bermidi. Ölgüchilerning sani heqqidimu toluqlima melumat bermidi. Muxbirimizning téléfon ziyaretliri dawamida, weqede ölgen we yarilan'ghanlarning hemmisiningla Uyghur ikenliki tekrar otturigha chiqish bilen birlikte, xitay da'irilirining bu uchurlarni “Dölet mexpiyetliki” qatarida yoshuriwatqanliqi aydinglashti.

Xitay da'iriliri 24 ‏-noyabir ürümchide yüz bergen ot apiti heqqide bériwatqan axbaratlirida, weqediki achquchluq uchur bolghan ölgüchilerning  kimliki, jümlidin milliy teweliki, yéshi we jinsi qatarliq uchurlar heqqide melumat bermidi.

Weqe yüz bergen künning etisidiki bayanatida, ölgüchilerning sanini 10 neper, yarilan'ghuchilarni 9 neper dep élan qilghan bolsimu, emma kéyinki künlerde ölgenlerning qanchige chiqqanliqi, yarilan'ghanlarning toluq saqayghan-saqaymighanliqi heqqide éghiz achmidi.

Biz ürümchidiki alaqidar idare-organlargha téléfon qilip, bu heqte melumat élishqa tirishtuq.

Ürümchi changjyang yoli saqchixanisining bir saqchisi, weqede ölgenlerning tizimliki heqqide saqchi xadimlirighimu hazirgha qeder uchur bérilmigenlikini ashkarilidi. Ürümchi sheherlik saqchi qomandanliq merkizining bir xadimi, bu uchurlarni téléfonda déyishke bolmaydighanliqini bayan qilish arqiliq, uning “Dölet mexpiyetliki”ge yatidighanliqini isharetlidi. Bu saqchixanidiki yene bir xadimmu, bu uchurlarning “Mexpiyetlik” ikenlikini tekitlidi.

Ürümchidiki ot ketken binada ilgiri bir mezgil olturghan we nöwette shiwétsariyede yashawatqan hebibulla izchi ependining bildürishiche, mezkur bina pütünley Uyghur sodigerler olturaqlashqan bina iken.

Pa'aliyetchi abduweli ayupmu öz éniqlashlirigha asasen, binaning Uyghurlar olturaqlashqan bina ikenlikini bildürdi.

Téléfonimizni qobul qilghan ürümchidiki Uyghur tibabet toxturxanisining bir xadimi, karantin seweblik doxturxana binasiningmu bölümler ara tosuwétilgenliki, shu sewebtin doxturxanigha élip kélin'gen yaridarlarning ehwalidin xewiri bolmighanliqini éytti.

Emma ürümchidiki bir ot öchürüsh xadimi bizning “Ölgüchilerning hemmisi Uyghur, shundaqmu?” dégen so'alimizgha jawaben, “Shundaq, Uyghur” dep jawab berdi. Biz uningdin yene “Ölgüchiler arsida birmu xenzu yoqmu?” dep sorighinimizda, u “Yoq” dep jawap berdi.

Weqede ölgüchilerning chet eldiki uruq-tughqanliridin hazir shiwétsariyede yashawatqan ablipiz memtiminning bayan qilishiche, weqede 4 balisi bilen ölgen qembernisa xanim uning hammisi bolup, qembernisaning weqede ölgen perzentlirining ismi abduraxman, imran, shehide we nehdiye iken.

Pa'aliyetchi abduweli ayup, weqede ölgenlerning a'ile ehwali Uyghur jem'iyitining bir kichiklitilgen körünüshi ikenlikini, shunga xitay da'irilirining weqede ölgenlerning milliy kimlikini yoshurush arqiliq, emeliyette ularning échinishliq a'ile tarixini we Uyghur jem'iyitide her bir a'ilidin bir yaki bir nechche kishining türmide ikenlikidek qorqunuchluq bir weziyettni xelq'aradin yoshuruwatqanliqini ilgiri sürdi.

Ablipiz memtiminmu hammisining yoldishi memet'eli metniyaz we chong oghli ilyas memtililerning 10 we 12 yilliq késilgen mehbuslar ikenlikini ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.