Qazaqistanliq Uyghur gimnastikichi hesen selimof wén'giriyede chémpiyon boldi

Qazaqistanliq gimnastikichi hesen selimof wén'giriyede ötküzülgen xelq'ara gimnastika musabiqide altun médalgha érishken. 2024-Yili 5-öktebir, wén'giriye

Qazaqistanning tenheriket ammiwi axbarat wasitiliri hem ijtima'iy taratqulirining xewerlirige qarighanda, qazaqistanliq gimnastikichi hesen selimof wén'giriyening gherbige jaylashqan qedimiy sheher sombatxéyda ötken gimnastika boyiche xelq'ara musabiqining nöwettiki basquchida 14.300 Nomur bilen altun médalgha érishken.

Xewerlerge qarighanda, gimnastika boyiche qazaqistan komandisi ikki altun médalgha érishken bolup, musabiqining birinchi künide uningda qazaqistanning qarighanda shehiridin kélip qatnashqan tenheriketchi darya yasinskaya 13.166 Nomur bilen altun médalgha érishken. Arqidin köp waqit ötmeyla yene bir qazaqistanliq tenheriketchi hesen selimof gimnastikining erkin türide, yeni gilemde sekresh türi boyiche birinchi orunni igiligen. Musabiqe bahalighuchiliri hesen selimofning gimnastikining murekkep éléméntlirini orunlighanliqini bayqap, özlirining yuqiri bahasini bergen hem shuning bilen u birinchilikni alghan. Bu heqte qazaqistanning olimpik komitétining metbu'at xizmitimu xewer bergen.

RFA/Oyghan

Biz gimnastika boyiche dunya chémpiyoni hesen selimof bilen alaqileshtuq. U radiyomiz ziyaritini qobul qilip, mundaq dédi: “Mende gimnastikining erkin türide, yeni gilemde sekresh türi boyiche dunya musabiqiside ghelibe qilish pilani bolghanidi. Xudagha shükri, bu emelge ashti. Biz birinchilikni igiliduq hem aldimizgha qoyulghan wezipilerni toluq orunliduq. Bu méning tejribemdiki birinchi utuq emes, elwette. Shuning üchün musabiqilerde ensiresh bolmidi. Özümni shunchilik yaxshi hés qildim. Yaxshi teyyarliqtin öttüm. Manga méning doxturlirim, barliq tirénérlirim yardem qildi. Hemmige rehmet, biz közligen meqsitimizge yettuq. Birinchilikni we yene shundaqla ayrim mukapatlarghimu érishtuq. Bu, men üchün intayin muhim. Elwette, ghelibidin da'im yaxshi hés-tuyghular qalidu. Méning barliq uruq-tughqanlirim, yéqinlirim, hetta qoshnilirim buninggha bek xushal boldi. Bu men üchün shunchilik köngüllük boldi. Méni qollighan hemmeylen'ge özümning minnetdarliqimni bildürimen. Wén'giriyede ötken musabiqide men gilemde sekresh hem gimnastikining erkin türide oyun körsitish boyiche hünirimni körsettim. Bolupmu gimnastikining erkin türide maharet körsitish boyiche yaxshi netijilerni qolgha keltürdüm.”

Qazaqistandiki yash Uyghurlardin yétiship chiqqan dangliq gimnastikichi nariman qurbanof bolup, uning netijiliri heqqide dunya ammiwi axbarat wasitiliri, ijtima'iy taratqular hemde “Erkin asiya” radiyosimu köpligen xewerlerni élan qilin'ghanidi.

Ene shu gimnastika boyiche olimpik chémpiyoni nariman qurbanof ziyaritimizni xushalliq ilkide qobul qildi. U hesen selimofning bu utuqliridin xushal bolup, mundaq dédi: “Bu basquch, hesenning kespiy pa'aliyitidiki ikkinchi utuq bolup hésablinidu hem u basquchtin ishenchlik halda ötti. Bu bizni heyran qaldurdi. Hesenning bu utuqi türkiyedin bashlandi hem bulghariyede dawam qildi. Emdi mana wén'giriyede ötken xelq'ara musabiqide uning utuqi altun médal bilen ayaghlashti. Heqiqeten bu intayin yaxshi netije. Sewebi u dunya musabiqisining ichide besh basquchta öz hünirini körsitip, uning üchide médalgha érishti. Uning bu netijiliri bizge shundaq ümid bériduki, hesen yéngi olimpik komandisi terkibide bolup, uning kélechekte olimpik musabiqilirige qatnishishigha bolghan ishenchimizni ashuridu.”

RFA/Oyghan

Qazaqistandiki Uyghur gimnastikichilirini terbiyeleshte köpligen pa'aliyetchilerning yétekchi rol atqurghanliqi melum. Shularning biri “Kéntawr” qabiliyetlik tenheriketchilerge yardem qilish jem'iyetlik fondining re'isi, qazaqistanning xizmet körsetken tirénéri mehmut iskenderoftur.

Mehmut iskenderof ependi ziyaritimizni qobul qilip, mundaq dédi: “Hesen selimof qazaqistan jumhuriyiti komandisining ezasi. U xelq'ara derijidiki tenheriket mahiri. U wén'giriyede ötken gimnastika boyiche xelq'ara musabiqide altun médal aldi. U, buningdin tashqiri bir qanchilighan basquchlargha qatniship, yaxshi netijilerni namayish qilghanidi. Hesen kélechiki bar tenheriketchi. U hazir kéler yili bolidighan dunya musabiqisige teyyarliniwatidu. Gimnastikining yéngi éléméntlirini öginiwatidu. Uning dunya chémpiyoni bolidighinigha ümidimizmu bar.”

Mehmut iskenderof bolupmu nariman qurbanofning olimpik chémpiyoni bolghanliqining peqet Uyghur xelqila emes, belki qazaqistan tarixida kütülmigen weqe bolghanliqini, uning kélechikigimu chong ümid bilen qaraydighanliqini bildürdi. U yene hesen selimoftinmu chong ümidlerni kütidighanliqini otturigha qoydi.

Igilishimizche, qazaqistandiki Uyghur yashliri peqet tenheriketla emes, belki ilim-pen, ma'arip, edebiyat, sen'et, bashqa sahelerdimu chong netijilerni qolgha keltürüp, qazaqistanning shan-sheripini tiklimekte.