Qeshqer tashmiliqta bashlan'ghuch mektep oqutquchiliridin az dégende 20 nepiri késiwétilgen

Qeshqer tashmiliqliq bir muhajirning inkas qilishiche, uning yurtdashliridin 10-kent bashlan'ghuch mektep oqutquchisi pashagül bexti ilgiri bir mezgil béshigha yaghliq artqan tarixi bolghanliqi üchünla “Diniy esebiylik” bilen eyiblinip késiwétilgen. Muxbirimizning téléfon ziyaretliri dawamida pashagül bextining 2018‏-yili 6 yérim yilliq késilgenliki we yéqinda jaza mudditini tügitip chiqqanliqi, pashagül bilen teng tutqun qilin'ghan 20 che oqutquchining téxiche jaza mudditini ötewatqanliqi ashkarilandi.

Nöwette yawropada yashawatqan qeshqer tashmiliqliq bir muhajir “Qeshqer konasheher saqchi höjjetliri” din pashagül bexti isimlik bir tonushining resimini uchratqan we munasiwetlik qanalliri arqiliq uning tutulush sewebi heqqide éniqlash élip barghan. Netijide u pashagülning 20 nechche oqutquchi xizmetdishi bilen birlikte diniy esebiylik bilen eyiblinip 7 yilliq késilgenlikini uqqan. Mezkur saqchi höjjetliride pashagül bextining 2017-yili 7‏-ayning 26-küni tutulghanliqi we 2018-yili “Yéngi terbiyelesh merkizi” ning c bina 408‏-yatiqida tutup turuluwatqanliqi qeyt qilin'ghan. Höjjette yene pashagülning “Jinayiti”, “Uniwérsal supa” namidiki torda aptomatik délo melum qilish sistémisi arqiliq pash bolghanliqi eskertilgen.

Mezkur arxipta yene déyilishiche, pashagül bexti tashmiliq 10‏-kent bashlan'ghuch mektipining oqutquchisidur. Biz pashagülning nöwettiki ehwali heqqide melumat élish üchün aldi bilen mezkur mektepning amanliq ishxanisigha téléfon qilduq. Alaqidar xadim özining bu xizmetke yéngi ikenlikini bildürüp, so'allirimizgha jawab bermidi.

Chet eldiki tashmiliqliq muhajirning igilishiche, pashagül bexti yézidiki bir qisim kesipdashliri teshkilligen ayallar chéyigha qatnashqan, chayda öz'ara turmush söhbetliridin bashqa jiddiy bir téma talash-tartish yaki muzakire qilinmighan. Peqet shu qétimliq chay, örp-adetler boyiche salam sa'et bilen bashlinip du'a bilen axirlashqan. Mushundaq turuqluqmu, 2014‏- we 2015‏-yillirighiche dawam qilghan bu chay, 2017‏-yiligha kelgende “Qanunsiz toplinish” we “Diniy esebiylikni tarqitish” dep qarilip, chay ezaliri pütünley tutup soraq qilin'ghan we köpinchisi oxshimighan muddette késiwétilgen.

Téléfonimizni qobul qilghan tashmiliq saqchixanisining bir xadimi, pashagül bextining tashmiliqtiki bir ottura mektep we birqanche bashlan'ghuch mekteptin bolup 20 nechche kesipdishi bilen teng tutulup késilgenlikini delillidi. Bu xadim pashagül bextining késilishide uning diniy keypiyatining “Alahide qoyuq” bolushining seweb bolghanliqini eskertti.

Mezkur saqchixanidiki xadimlarning yene déyishiche, pashagül bexti üstidin délo turghuzulghandin kéyin, u qatnashqan chaydiki ayallarla emes, ularning a'ile ezaliri we uruq-tughqanlirimu tutup tekshürülgen. Bu jeryanda, bu ayallar chéyigha sorun hazirlap bergen toxtaji bekri, turghunjan, memet'imin qatarliq bir qisim erlermu tutqun qilin'ghan. Eskertilishiche, bular 6 yil bilen 15 yil arisida késilgen.

Melum bolushiche, pashagül bexti bilen birlikte chaygha qatnashqan, béshida yaghliqi bar ayallar eyni chaghdiki “Diniy esebiylikke qarshi heriket” dawamida “Gunah” ini tonup yaghliqliridin waz kechken bolsimu, emma 2017‏-yiligha kelgende qayta tutqun qilin'ghan.

Tashmiliq yéza 10‏-kent sékrétarining déyishiche, pashagül bexti bu yil 1‏-ayda 6 yérim yilliq jaza mudditini tügetken, 2‏-ayda “Terbiyelesh merkizi” ge apirip yene 6 ay “Terbiye” bérilip qoyup bérilgen. Melum bolushiche, bu yil 6-ayda uninggha ilgiri jaza ötigen mezgildiki körgen-bilgenlirini jem'iyetke yaymasliq heqqide mexsus telim bérilgen.

Yuqirida qeshqer tashmiliqta pashagül bexti qatarliq 20 nechche oqutquchining bir ayallar chéyigha qatnashqanliqi üchünla “Qanunsiz toplinish” bilen eyiblinip jazalan'ghanliqi heqqide melumat berduq.