Qirghizistanda “Irpan fést” namidiki Uyghur medeniyet féstiwali bashlandi

18-Awghust küni qirghizistanning issiq köl wilayitidiki tong yézisida “Irpan fést” namida Uyghur medeniyet féstiwali bashlandi. Mezkur féstiwalgha qirghizistan, qazaqistan, özbékistan we bashqa ellerdin kelgen Uyghur sen'etkar, sha'irlar we ziyaliylar qatniship, öz maharetlirini namayan qilmaqta.

“Irpan fést” dep atalghan mezkur féstiwal “Érpan” Uyghur tereqqiyat pirogrammilirini qollash fondi teripidin uyushturuldi. Murasim töt kün dawam qilidighan bolup, uningda Uyghur tili, medeniyiti we tarixi toghrisidiki türlük mezmunlar körgezme qilinidiken.

“Irpan fést” féstiwali 17-awghust küni bishkek shehiride chet ellerdin kelgen méhmanlarni kütüwélish pa'aliyiti we birlikte nashtiliq qilish bilen bashlandi. Andin féstiwal wekilliri kolléktip halda taghlarni arilap issiq köl tewesige sayahetke chiqishti.

“Irpan” fondining re'isi nurmuhemmet kenjiyéw ependi radiyomiz ziyaritini qobul qilip, mezkur murasimning meqsiti toghrisida toxtilip ötti. U, bügünki künde Uyghurlarning jem bolushi we Uyghur medeniyiti toghrisida mexsus pa'aliyet ötküzüshi, muhim témilarning biri dep tekitlidi.

Mezkur medeniyet murasimi bashlan'ghan féstiwal meydani Uyghur milliy buyumliri we Uyghur xelqining hayati teswirlen'gen resimler bilen zinnetlendi. Qazaqistandin kelgen “Chéwer qol” uyushmisining xanim-qizliri murasim qatnashquchilirini Uyghur milliy ta'amliri bilen kütüwélishti. Radiyomiz ziyaritini qobul qilghan “Chéwer qol” uyushmisining re'isi ilyakowa merwanem xanim “Irpan fést” murasimigha qatniship, özlirining milliy en'enilirini we hünerlirini namayan qilghanliqidin bekmu xursen bolghanliqini izhar qildi.

Mezkur murasim qirghizistan dölet gémini we érpan fondining re'isi nurmuhemmet kenjiyéwning échilish sözi bilen bashlandi, andin konsért pirogrammiliri körsitildi.

Özbékistandin qatnashqan sen'et doktori, özbékistan dölet konsérwatoriyesidiki Uyghur muqam bölümining oqutquchisi gülzire ablet xanim, féstiwal ehlige Uyghur naxshilirini teqdim qildi. Özbékistandin kelgen hekime wélyamowaning rehberlikidiki “Elnure” wokal ansambili, qazaqistandin kelgen “Dostluq” milliy chalghu eswablar ansambili, nadiya rémbakiyéwaning rehberlikidiki “Yashlar awazi” wokal topi, yarkenttin kelgen oghlem tahirowaning rehberlikidiki “Dil saz” muqam ansambili we yene bashqa sen'et söyerler özlirining naxshiliri we ewrishim ussulliri bilen tamashibinlarning qelbini lerzige sélishti.

Mezkur murasimgha qatnashqan “Dostluq” milliy muzika ansambilining ustazi sabirjan manashow radiyomiz ziyaritini qobul qilip, mezkur féstiwalning yash ewladlar üchün ehmiyiti zor bolghan bir pa'aliyet ikenlikini ilgiri sürdi.

“Érpan fést” pa'aliyiti dawamida yene yash ressamlar körgezmisi bolup ötti. Shu körgezmige özlirining eserlirini namayan qilghan sabrina telibjanowa ziyaritimizni qobul qilip, öz resimliride Uyghur xelqining tarixi we ijtima'iy hayatini teswirligenlikini tilgha élip “Yetti qizlirim” esiri toghrisida tepsiliy toxtaldi.

Uyghur medeniyiti heqqidiki bu féstiwal qirghizistanda birinchi qétim ötküzülüwatqan bolup, ottura asiyadiki her qaysi döletlerdin kelgen Uyghur wekilliri özlirining tebrik sözliri we yürek sözlirini “Irpan” fondigha, shundaqla bu pa'aliyetni teshkilligüchilerge izhar qilishti. Murasimning axirida “Érpan” Uyghur tereqqiyat pirogrammilirini qollash fondi qazaqistan, özbékistan we qirghizistandiki sen'et toplirining rehberlirini, shundaqla sha'ir we ilim igilirini médal, sowghat we teqdirnamiler bilen mukapatlidi.