Qirghizistan Uyghurliri yeken élishqu qirghinchiliqini xatirilidi

28-Iyul küni qirghizistan Uyghurliri bishkek shehirining yénidiki nowopokrofka mehellisige jaylashqan dostluq meschitige jem bolup, 2014-yili 28-iyul küni yeken nahiyesining élishqu yézisida yüz bergen qanliq qirghinchiliqta shéhit bolghan qérindashlirigha atap xetme qur'an qilishti. Murasimgha bishkek shehiri we uning etrapidiki Uyghurlar zich olturaqlashqan mehellilerning yigit bashliri, ahaliliridin bolup 60 tin oshuq kishi qatnashti.

Mezkur murasim dunya Uyghur qurultiyining qirghizistandiki wakaletchisi rozimuhemmet abdulbaqiyéfning teshebbusida uyushturuldi. Radiyomiz ziyaritini qobul qilghan rozimuhemmet ependi öz qarashlirini bildürüp: “Yeken élishqu qirghinchiliqi Uyghur xelqining tarixidiki yéngi bir paji'elik qismet” dédi.

Buningdin ilgiri dunya Uyghur qurultiyi re'isi dolqun eysa ependi yighin uyushturup, yeken nahiyesining élishqu-xandi yézilirida yüz bergen qanliq paji'ede öltürülgen kishilerni xatirileshke chaqiriq qilghanidi. Qirghizistan Uyghurliri bu chaqiriqqa awaz qoshup, bezi bir murekkep mesililerdin atlap ötüp, dunya Uyghur qurultiyining qirghizistandiki wakaletchisi rozimuhemmet abdulbaqiyéfning tirishchanliqi bilen mezkur xatirilesh murasimini uyushturdi.

Mezkur murasimgha qatnashqan qirghizistan Uyghurliri “Ittipaq” jem'iyiti aq-saqallirining biri gheyret jahanof ependi ziyaritimizni qobul qilip, yeken élishqu qirghinchiliqi toghrisida öz qarashliri we melumatlirini bildürdi.

Qirghizistan Uyghurliri özlirining milliy en'eniliri we örp-adetlirini yaxshi saqlap kelgen bolup, ular öz milliy medeniyitini téximu rawajlandurushqa we Uyghur élidiki siyasiy weziyetke qarita öz ipadilirini hem naraziliqlirini bildürüshke tirishidu. Lékin qirghizistan öz dölet menpe'etlirini oylap, xitay hakimiyiti bilen bolghan her türlük hemkarliq munasiwetlirini künséri kücheytip kelmekte. Bu, qirghizistan Uyghurlirining pa'aliyetlirige belgilik tesir körsetmekte. Shundaq bolsimu, qirghizistan Uyghurliri Uyghur diyarida yüz bergen 5-aprél barin inqilabi, 5-féwral ghulja qirghinchiliqi, 5-iyul ürümchi qanliq qirghinchiliqi qatarliq zor weqelerni xatirilep, qirghinchiliqqa, basturushqa uchrighan qérindashlirini türlük shekilde yad étip kelmekte.