En'gliyige chiqqan “Shinjang karxanichilar ömiki” ichide birmu Uyghur yoq

Xitayning xelq'ara xewerler toridin melum bolushiche, bu ömek 23-yanwar küni en'gliyilik karxanichilargha Uyghur élining iqtisadiy ehwali, en'gliye we Uyghur élining tijaret sahesidiki hemkarliqini ashurushning yollirini tonushturup ötken. Emma qiziqarliqi, Uyghur élidin kelgen bu karxanichilar hey'itining ichide birmu Uyghur karxanichi yer almighan.

Xitay hökümiti 2009-yili ürümchi weqesidin kéyin rayon'gha zor meblegh salghanliqini ilgiri sürsimu, yerlik millet Uyghurlarning iqtisadiy tereqqiyatning sirtida qalduruluwatqanliqi melum. Dunya Uyghur qurultiyi bu heqte bergen bayanatida, Uyghur élide yolgha qoyulghan halqima tereqqiyat siyasitining emeliyette ichkiridin chiqqan xitay tijaretchi, karxanichilarni bay qiliwatqanliqini, Uyghurlarning eksiche téximu namratlashqanliqini bildürgen idi.

2011-Yili birinchi nöwetlik xelq'ara yawro'asya yermenkisi bashlan'ghandimu chet'eldin kelgen muxbirlar yermenkige qatnashqan Uyghur karxanichilarning barmaq bilen saniwalghudek derijide azliqini alahide tilgha élip, xitay hökümitining Uyghurlar üstidin ayrimichiliq siyasiti yürgüzüwatqanliqini ipade qilghan.