Бейҗиңда оқуватқан уйғур қизи паспорт елиш һоқуқини қанун бойичә қоғдашқа тиришти

Йеқинда бейҗиңда оқуватқан бир уйғур қиз чәтәлгә чиқиш үчүн паспортқа илтимас қилғандин кейин, 23 күнгичә җавабқа еришәлмигән. У, өткән йилиму пасортқа илтимас қилип, икки айдин кейин бейҗиңдики мунасивәтлик орунлар “шинҗаң тәрәп саңа паспорт ишләп бәрмиди” дегән җавабни бәргән. “уйғур биз ториниң” хәвәр қилишичә, өзини уйғурай дәп атиған бу қиз хитайчә “вейбо” торида учур елан қилип, өзиниң паспорт елиш һоқуқиниң дәхли - тәризгә учраватқанлиқини шикайәт қилип, хәнзулар билән уйғурларниң бу җәһәттики һоқуқлириниң тамамән пәрқлиқ икәнликини баян қилған.

Учурдин мәлум болушичә, буз қиз 13 - декабир күни “җуңхуа хәлқ җумһурийитиниң паспорт қануни” ни бесип чиқирип, бейҗиң шәһәрлик чегридин кириш - чиқиш ишлирини башқуруш идаирисигә берип, өзигә паспорт ишләп бәрмәсликниң сәвәбини язма чүшәндүрүшни тәләп қилған. Бу орунниң башлиқи әһвални уққандин кейин униңға “йәнә бир қетим тәкшүрүп көримиз” дәп җаваб бәргән.

Мәлум болушичә, хитай қанунида көрситилишичә, һәммә хитай пуқрасиниң қайси милләт болушидин қәтийнәзәр паспорт елиш һоқуқи бар. Бирақ хәнзулар халиған вақитта паспортқа илтимас қилип, тез арида униңға еришәләйду, әмма уйғурлар көп тәкшүрүшләрдин өтиду, йеқинда америкиға кәлгән, исмини ашкарилашни халимиған бир кишиниң ейтишичә, қәшқәр, хотән, ақсу қатарлиқ җайларда уйғурларниң паспорт елиши интайин қийин икән.