А у б уйғурларға қаритилған паспорт ишләш мәсилисидики кәмситишкә дәрһал хатимә беришни тәләп қилди

Баянатта: хитай һөкүмити өз қануниға һөрмәт қилип, хитай хәлқ җумһурийитиниң паспорт қануниға асасән уйғурларниң барлиқ паспорт илтимасини беҗирип бериши, шуниң билән биргә сәвәбсиз вә йолсизларчә мусадирә қилинған барлиқ уйғур паспортлирини қайтуруп бериши керәк, дегән.

Хитайниң уйғурларға паспорт беришни қаттиқ контрол қиливатқанлиқи мәлум болсиму, бирақ йеқинда бейҗиң шәһәрлик җ х идарисиниң атикәм рози исимлик бир оқуғучи қизға паспорт беришни рәт қилиши чәтәл ахбаратлирида елан қилинип, бу мәсилә хәлқара җамаәт пикриниң диққитини қозғиған иди.

Америка уйғур бирләшмисиниң рәиси алим сейитоф баянатта мундақ дегән: бу хил өз қануниға хилаплиқ қилиш һәрикити хитай даирилириниң қанун бойичә иш көрүшкә қизиқмайдиғанлиқини ениқ ашкарилиди. Уйғурларниң параванлиқини қоғдашқа тегишлик бу кишиләрниң дәл өзи уйғурларни кәмситиватиду. Бу хитай һөкүмитиниң хәлқарада йетәкчилик рол ойниялайдиған яки ойниялмайдиғанлиқиға нисбәтән соал пәйда қиливатиду.

Америка уйғур бирләшмиси мәзкур баянатни җ х органлириниң йеқинда атикәм розиға паракәндичилик салғанлиқи мунасивити билән елан қилған.

“уйғурбиз” ториниң хәвәр қилишичә, ақсуниң тоқсу наһийилик җ х идариси юртиға қишлиқ тәтилгә барған атикәм розини тутуп сорақ қилған. Тор бекитиниң хәвиридә йәнә, дөләт бихәтәрлик даирилириниң 7‏-феврал саәт бир йеримдә атикәмниң өйигә келип, униңға йәнә паракәндичилик салғанлиқини билдүргән.