A u b Uyghurlargha qaritilghan pasport ishlesh mesilisidiki kemsitishke derhal xatime bérishni telep qildi

Bayanatta: xitay hökümiti öz qanunigha hörmet qilip, xitay xelq jumhuriyitining pasport qanunigha asasen Uyghurlarning barliq pasport iltimasini béjirip bérishi, shuning bilen birge sewebsiz we yolsizlarche musadire qilin'ghan barliq Uyghur pasportlirini qayturup bérishi kérek, dégen.

Xitayning Uyghurlargha pasport bérishni qattiq kontrol qiliwatqanliqi melum bolsimu, biraq yéqinda béyjing sheherlik j x idarisining atikem rozi isimlik bir oqughuchi qizgha pasport bérishni ret qilishi chet'el axbaratlirida élan qilinip, bu mesile xelq'ara jama'et pikrining diqqitini qozghighan idi.

Amérika Uyghur birleshmisining re'isi alim séyitof bayanatta mundaq dégen: bu xil öz qanunigha xilapliq qilish herikiti xitay da'irilirining qanun boyiche ish körüshke qiziqmaydighanliqini éniq ashkarilidi. Uyghurlarning parawanliqini qoghdashqa tégishlik bu kishilerning del özi Uyghurlarni kemsitiwatidu. Bu xitay hökümitining xelq'arada yétekchilik rol oyniyalaydighan yaki oyniyalmaydighanliqigha nisbeten so'al peyda qiliwatidu.

Amérika Uyghur birleshmisi mezkur bayanatni j x organlirining yéqinda atikem rozigha parakendichilik salghanliqi munasiwiti bilen élan qilghan.

“Uyghurbiz” torining xewer qilishiche, aqsuning toqsu nahiyilik j x idarisi yurtigha qishliq tetilge barghan atikem rozini tutup soraq qilghan. Tor békitining xewiride yene, dölet bixeterlik da'irilirining 7‏-féwral sa'et bir yérimde atikemning öyige kélip, uninggha yene parakendichilik salghanliqini bildürgen.