Bu yil paxta térishqa kelgen xitay ishlemchiler eng yuqiri kirim qilghan yil boldi

Bu yil xitaydin paxta térishqa kelgen her bir ishlemchining otturiche kirimi 6622 yüen bolup, bulturqidin yene 10% ge yéqin kötürülgen.

Yurti xénen'ge qaytish aldida tengritagh tori muxbirining ziyaritini qobul qilghan xénenlik paxta tergüchilerdin ju liping, go shyawlen, ma jingjinlar her biri bu yil bingtu'ende paxta térish arqiliq tapqan kirimining 15ming yüendin ashqanliqini éytqan. Bu yil bingtu'en'ge paxta térishqa kelgen xitaylarning kélip ‏-kétish kirasi, tamaq we yataq chiqimlirini bingtu'en tarmaqliri pütünley öz üstige alghan. 145 Qétim mexsus poyiz wagoni ajratqan. Buning bilen xitay paxta tergüchi pesillik ishlemchiler bu yil eng yuqiri kirim qilghan yil bolup qalghan.

Uyghurlar, rayondiki ish pursetliri we barliq tereqqiyatlargha xitay köchmenliri ige bolup, eksiche yerlik xelqning chetke qéqiliwatqanliqi, hökümetning yene Uyghur yashlirini erzan qul ornida xitay zawutlirigha ishlemchilikke yötkep kétiwatqanliqidin narazi bolup kelmekte. Her yili xitaygha “Yéza éshincha emgek küchliri” namida Uyghur élidin yötkiliwatqanlarning sani 200 mingdin ashidu.

Her yili Uyghur élige kélidighan milyon'gha yéqin xitay ishlemchiler bilen Uyghur élidin xitay ölkilirige éshincha emgek küchi süpitide yötkiliwatqan bu Uyghur ishlemchilerning ish heqqi we xizmet, turmush shara'itlirida zor perq bolup, xitaydiki zawutlargha ishleshke barghan bezi Uyghur yashlar, xitay zawutlirida künde 10-12 sa'etlep ishlepmu ayliq kirimining ikki ming yüen'ge barmaydighanliqini, zawut kattiliri we xitaylarning kemsitishige, her xil xorluqlargha uchrap turidighanliqini inkas qilip kelmekte.

2009-Yili 6-ayning 26-küni gu'angdung shuri oyunchuq zawutidiki 8 minggha yéqin Uyghur ishlemchilerning 20 mingdin artuq xitaylarning qanliq hujumigha uchrash weqesi dunyani chöchütken idi shundaqla-5 iyun weqesige seweb bolghan idi.