Ürümchide 680 ming köchmen turush guwahnamisi aldi

Uyghur biz torida bu heqte bérilgen toluqlima uchurlardin melum bolushiche, 22-awghusttin bashlap, Uyghur élining ürümchi qatarliq sheherlirige bashqa ölkilerdin oqush üchün kelgen oqughuchilar we ishlemchiler üchün, shopurluq kinishkisi élish, dawalinish, aptomobil nomur taxtisi élish qatarliq resmiyetlerde “Yéshil karidor” namidiki alahide téz béjirish yoli arqiliq ürümchide turush guwahnamisini bir kün ichide béjirip bolush shara'iti yaritilghan.

Da'iriler bu yil 5-ayda uqturush chiqirip, yéqinqi bir mezgil ichide Uyghur élidiki köchme nopuslardin 6 milyon kishige rayonda turush guwahnamisi béjirip bérilip, ularning Uyghur rayonidiki barliq shara'itlardin behrimen qilinidighanliqini bildürgen idi. Bu xewer dunya Uyghur qurultiyi qatarliq chet'ellerdiki Uyghur teshkilatlirining eyiblishige uchrap, chet'el metbu'atlirida türlük inkas peyda qilghandin kéyin, da'iriler Uyghur élige yerleshtürülidighan köchme nopusning heqiqiy sani heqqide qayta melumat bermigen idi.

Xitay weziyitini közetküchilerning bildürüshiche, gerche xitay da'iriliri Uyghur rayonigha yéqin mezgil ichide yene qanchilik xitay köchmenni yötkeydighanliqi heqqide metbu'atlargha éniq melumat bermigen bolsimu, emma kéyinki ikki yil ichide, ürümchi, qeshqer, ghulja qatarliq sheherlerni yenimu kéngeytidighanliqi, Uyghur aptonom rayonida milyon nopusluq chong sheherlerni quridighanliqi heqqide xewer tarqatqan idi.