Бейҗиң паспорт беҗириш даирилири: бейҗиңдики уйғурларға паспорт беришни биз қарар қилмаймиз
2012.12.19
“йәр шари вақти гезити” ниң инглизчә бети чаршәнбә күни мәзкур мәсилә һәққидә мақалә елан қилди. Мақалидә илгири сүрүлүшичә, бейҗиң паспорт беҗириш орниниң лин фамилилик баянатчиси атикәмгә паспорт беришниң рәт қилиниши һәққидә тәпсилий пикир билдүрүшни рәт қилип, бирақ охшимиған районларниң охшимиған бәзи тәләп-өлчәмлириниң болидиғанлиқини билдүргән.
“йәр шари вақти гезити” ниң мақалисидә йәнә, шинҗаң иҗтимаий пәнләр академийисиниң ярдәмчи тәтқиқатчиси турғунҗан турсунниң сөзи нәқил кәлтүрүлгән болуп, у җуңгониң паспорт қануни вәтәндашлириға 15 күн ичидә паспорт беҗирип беришни буйрусиму, бирақ хәнзулар билән башқа аз санлиқ милләтләргә охшимиған өлчәм қоюлидиғанлиқини тәкитлигән.
Атикәм рози, бейҗиң милләтләр университетиниң 3 йиллиқ оқуғучиси болуп, у аз дегәндә икки қетим паспортқа илтимас қилған болсиму, бирақ бейҗиң шәһәрлик сақчи идариси униң илтимасини рәт қилған. Шуниң билән у “сина” микро блогиға пикир йезип, миллий кәмситишкә учриғанлиқини паш қилған. Бу вәқә “сина” микро блогида ғулғула қозғиған иди.
“йәр шари вақти гезити” ниң мақалисидә илгири сүрүшичә, бейҗиң шәһәрлик паспорт беҗириш орниниң бир аял әмәлдари уйғурларға паспорт беҗириш һәққидә тохтилип, “шинҗаң пуқралири паспортқа илтимас қилса, буни бизниң бейҗиң тәрәп қарар қилмайду. Биз шинҗаң тәрәпниң сақчи оргини билән алақилишип, униң қанунлуқ яки қанунлуқ әмәсликини тәкшүримиз вә шуниңға қарап җаваб беримиз” дегән.