Tutqundiki bortalaliq yash quddus abduwelining qumulda sotlan'ghanliqi we 5 yil 4 ayliq késilgenliki delillendi

Nöwette amérikada yashawatqan sehibe sayram'oghlining tiwittirda xewer qilishiche, uning qumulda tutup turuluwatqan bortalaliq inisi quddus abduweli 10‏-may yeni jüme küni qumulda sotlan'ghan. Muxbirimizning bu heqtiki éniqlashliri dawamida quddus abduwelining qumul ottura sot mehkimiside yérim yépiq halda sotlan'ghanliqi we 5 yil 4 ayliq késilgenliki delillendi.

10 Aydin béri qumulda tutqundiki inisi quddus abduwelining aqiwitidin endishe qilip turghan sehibe sayram'oghli ötken hepte, ata-anisining yurti bortaladin qumulgha kelgenlikidin xewer tapqan. Inisi heqqide birer yaxshi xewerge érishish üchün ata-anisi bilen izchil alaqiliship turghan sehibe, ata-anisidiki éhtiyatchanliq sewebidin inisi heqqide éniq bir uchurgha érishelmigen. U ata-anisining 10-may yeni jüme küni inisi bilen uchrishidighanliqini bilip, uning shu küni sotlinidighanliqini perez qilghan. U ata-anisining jüme künidiki uchrishishtin kéyin bortalagha inisi almay qaytqanliqini uqup inisining sotta késilgenlikidin xewer tapqan. Emma yenila yil késimidin xewersiz qalghan.

Biz bu sot heqqide melumat élish üchün, qumulning iwirghul rayonluq xelq sot mehkimisige téléfon qilduq. Téléfonimizni qobul qilghan xadim, bizning bu délo heqqide uchur igilesh hoquqimiz yoq ikenlikini bildürdi.

Sehibening déyishiche, inisi bir putbol heweskari bolup, waqtini asasen putbol oynash we putbol xewerlirini körüsh bilen ötküzüp kelgen, jem'iyettiki jiddiy we nazuk mesililerdin özini uzaq tutup kelgen biri iken. Shunga u we a'ilisi quddusning bir uqushmasliq sewebidin tutulghanliqini perez qilip, téz arida qoyup bérilishini teqezzaliq bilen kütken. Emma netije ular kütkendek bolmighan.

Téléfonimizni qobul qilghan qumul ottura sot mehkimisining bir xadimi, qolidiki arxiplargha qarap chiqqandin kéyin, quddus abduweli üstidin jüme küni sot échilghanliqini delillidi. Emma quddusning qanche yil késilgenliki heqqide melumat bermidi. Téléfonimizni ikkinchi qétim qobul qilghan éwirghol rayonluq sot xadimi, quddusning sotlinish jeryani heqqidiki so'alimizgha jawaben, bu sotning ottura sotta échilghanliqini delillidi.

Sehibening perez qilishiche, sotta adwokat bolmighan. Anisi sot axirida quddus bilen 1-2 minutchila sözlishish pursitige érisheligen, dadisigha bu purset bérilmigen.

Qumul ottura sotning bir xadimi, quddus abduweli üstidiki bu sotning yépiq shekilde ötküzülgenliki, shunga quddus abduwelining késilish sewebi we késim mudditi heqqide melumat bérelmeydighanliqini tilgha aldi.

Sehibe ata-anisining renggi-rohiydiki alametlerge qarap inisining késim mudditini perez qilishqa tirishqan, peqet éniq uchurgha érishelmigen.

Qumul sheherlik qamaqxanining bir xadimi quddus abduwelining 6 yilliq késilgenliki, uningdin awwal sotlan'ghan qeyser isimlik bir dostining bolsa, 5 yilliq késilgenlikini ashkarilidi.

Ötken yili axirqi éniqlashlirimizda, quddus abduwelining qumul wilayetlik pédagogika aliy téxnikomidiki bir türküm oqughuchilar sadir qilghan bir sirliq “Chong délo” gha chétilghanliqi, délogha chétishliq yashlarning 50-60 che barliqi melum bolghan.

Melum bolushiche bu délogha chétilghanlar, bortala, qarimay, ürümchi qatarliq sheher we wilayetlerdin bolup, bularning köpinchisi sotsiz yaki yépiq shekildiki sot hökümliri bilen türmilerge tashlan'ghan. Bularning ichidin peqet quddus bilen qeyser isimlik bir dostining sotila yérim yépiq shekilde, yeni ata-anisining qatnishishi bilenla ötküzülgen. Bulardin bortalaliq yash intizarning sotining mushu charshenbe yaki peyshenbe küni échilidighanliqi melum bolmaqta.

Ilgiriki éniqlashlirimizda yene bu délogha chétishliq yashlarning bir qismining intérnétta tamdin atlash we qanunsiz matériyallarni körüsh seweblik tutqun qilin'ghanliqi melum bolghan, emma délodiki köpinche yashlarning, bolupmu gholluq gumandarlarning néme sewebtin tutulghanliqi ta hazirghiche melum emes.