Rézhissor ikram nurmemet térrorluq bilen eyiblinip 6 yérim yilliq késiwétilgen

Ilgiriki éniqlashlirimizdin melum bolushiche, béyjingda yashawatqan we tyenjinde xizmet qiliwatqan yash rézhissor ikram nurmemet ötken yilning otturiliri béyjingdin tutup kétilgen we yil axirida ürümchide sotlan'ghan. Uning tutulushi we sotlinishigha, shuningdin birqanche yil awwal türkiyede marmara uniwérsitétida oqush we türk filim shirketliride ishlesh jeryanida körülgen “Mesililiri” seweb bolghan. Yene shu chaghdiki éniqlishimizdin melum bolushiche, sotta ikram nurmemetke chétilip uning bilen türkiyediki chéghida munasiwet qilghan töt neper dostimu sotlan'ghan we bular térrorluq guruppisi qurush we qétilish bilen eyiblen'gen.

Bu sot heqqide eng deslepte xewer bergen en'gliyediki “Muhapizetchi” gézitining xewer qilishiche, ikram we dostliri soraq jeryanida éghir qéyin-qistaqqa élin'ghan we ikramdin bashqiliri “Jinayiti” ni iqrar qilishqa mejbur bolghan؛ sotta höküm kéyin'ge qaldurulghan.

Weziyettin xewerdar kishining ötken hepte yene radiyomizgha inkas qilishiche, sot hökümi bu yil 1-ayda chiqqan we hökümde ikram we dostliri ayrim-ayrim halda 5 yildin 6 yérim yilgha qeder qamaqqa höküm qilin'ghan. Ikram “Jinayet” guruhining yétekchisi dep qarilip 6 yérim yilliq késilgen. Téléfonimizni qobul qilghan ürümchi ottura sotning bir xadimi ikram nurmemetning 6 yérim yilliq késilgenlikini delillidi.

Weziyettin xewerdar kishining déyishiche, sot hökümidin ikram nurmemetning béyjingdiki ayali we ürümchidiki anisi xewersiz qaldurulghan. Ikram nurmemet hökümge naraziliq erzi sunmaqchi bolghan bolsimu, musteqil bir adwokati bolmighanliqi we a'ilisi bilen alaqe qilalmighanliqi üchün, xitay qanunlirida qeghez yüzide békitilgen 3 ayliq qayta erz sunush pursitidinmu paydilinalmighan. Téléfonimizni qobul qilghan yene bir saqchi xadimi, ikram nurmemet üstidin höküm chiqip bolghan bolsimu, emma téxi türmige yötkelmigenliki, yenila qamaqxanida tutup turuluwatqanliqini ashkarilidi. Ilgiriki éniqlashlirimizda, Uyghur élining köpinche jayliridiki türmilerde bosh orun bolmighanliqi üchün, mehkumlarning türmilerge yötkelmey qamaqxanida tutup turuluwatqanliqi melum bolghan؛ qamaqxanining shara'iti türmidinmu nachar bolghachqa, bezi mehkumlarning qamaqxanidin qutulush üchünla, “Jinayiti” ni iqrar qilishqa mejbur boluwatqanliqi ashkarilan'ghanidi.

Ötken yilqi éniqlashlirimizda, ikram nurmemetning türkiyede oquwatqan mezgilide xitayning chishigha tégidighan heriketlerdin saqlinish üchün türkiyediki Uyghur jama'itidin uzaq turghanliqi, hetta Uyghur oqughuchilar bilenmu bir yataqta yatmighanliqi, shundaq éhtiyat qilip turupmu, xitayning gumanidin qutulalmighanliqi ashkarilan'ghanidi.

Bu qétimqi éniqlashlirimizda, uning 4 dostining késiwétilgenliki delillen'gen bolsimu, emma ularning éniq kimlikliri téxi aydinglashmidi.

Yuqirida tyenjinde élanchiliq we qisqa höjjetlik filim ishlesh bilen meshghul boluwatqan rézhissor ikram nurmemetning 6 yérim yilliq késilgenliki heqqide melumat berduq.