Doktor rishat abbas Uyghur akadémiyesining yene bir nöwetlik re'islikige saylan'ghan

Enqeredin ixtiyariy muxbirimiz erkin tarim teyyarlidi
2024.12.23
rishat-abbas-uyghur-akademiyesi-dc-01 “Uyghur sen'et körgezmisi” témisidiki muhakime yighinida Uyghur akadémiyesining re'isi, tébbiy penler doktori rishat abbas sözlewatidu. 2024-Yili 4-dékabir, washin'gton
RFA/Shehrizad

21-Dékabir küni Uyghur akadémiyesining her qaysi döletlerdiki shöbe organlirining re'isliri we mu'awin re'isliri, bash katipliri, akadémiyege qarashliq institut we komitét mudirliridin terkib tapqan 20 din artuq da'imiy hey'et ezasi yighilip mexsus tor yighini achqan. Bu yighinda Uyghur akadémiyesining 7-nöwetlik re'islik saylimi yoshurun awaz tashlash arqiliq élip bérilghan. Netijide tébbiy dora tetqiqat alimi doktor rishat abbas ependi yene bir qétim Uyghur akadémiyesining re'isi bolup saylan'ghan.

Saylam axirlashqandin kéyin téléfon ziyaritimizni qobul qilghan doktor rishat abbas ependi, ikkinchi qétim qayta saylan'ghandin kéyinki tuyghulirini radiyo anglighuchilar bilen ortaqlashti. U mundaq dédi: “Men bu saylamdin kéyin müremdiki yükning yenimu éghirlashqanliqini hés qildim. Buningdin kéyin xizmetlirimizni téximu chongqur we keng da'iride élip bérishimizning zörürlükini tonup yettim”.

21-Dékabir künidiki saylamdin burun doktor rishat abbas ependi Uyghur akadémiyesining 2021-yilidin bügün'giche bolghan 3 yilliq xizmitidin doklat bergen. Uyghur akadémiyesi ijra'iye komitétining mu'awin re'isi abdulhemid qaraxan ependi bu toghriliq bizge melumat bérip ötti: “Uyghur akadémiyesining bu nöwetlik re'islik saylimida tébbiy dora tetqiqat alimi doktor rishat abbas ependi 2021-yilidin buyanqi 3 yilliq xizmet doklatini oqup ötti. U, doklatida Uyghur akadémiyesining teshkiliy tüzümini mukemmelleshtürüsh, Uyghur irqiy qirghinchiliqi dawamliq otturigha qoyush, Uyghur milliy mewjutluqini qoghdash, chet eldiki Uyghur yashliri üchün yürüshleshken Uyghur ata til derslik kitabini tüzüp chiqish, Uyghur yashlirini terbiyelesh, teshkilat we aliy mektepler bilen hemkarlashqan asasta irqiy qirghinchiliqni toxtitish üchün amérika dölet mejliside Uyghurlar bilen munasiwetlik qanunlarning maqullinishida türtkilik rol oynighanliqini otturigha qoydi”.

Tébbiy dora tetqiqat alimi doktor rishat abbas, akadémiyening aldinqi 3 yildin buyan qiliwatqan xizmetlirini dawamlashturush bilen birlikte, Uyghur irqiy qirghinchiliqini toxtitish, Uyghurlarning öz musteqilliqini qolgha keltürüsh üchün barliq küchi bilen tirishchanliq körsitidighanliqini tekitligen. Abdulhemid qaraxan ependi bu heqtimu toxtilip ötti.

Uyghur akadémiyesi yawropa shöbisining mes'uli doktor abdushükür abduréshit ependi, saylam axirlashqandin kéyin yighin'gha qatnashqan rehberlerning arqa-arqidin söz qilip, doktor rishat abbasni tebrikligenlikini؛ buningdin kéyinki xizmetliride uninggha muweppeqiyetler tiligenlikini eskertip ötti.

Abdulhemid qaraxan ependining bildürüshiche, Uyghur akadémiyesini eng deslep 9 neper Uyghur ziyaliysi istanbul shehiride 2009-yili 9-ayning 9-küni qurup chiqqan. Bu ilmiy organ shu yillarda muhajirettiki Uyghur ziyaliylar we oqughuchilar üchün bir yéngi ümid munbiri bolghan iken. Igilinishiche, Uyghur akadémiyesining 2017-yilighiche bolghan 8 yilliq emeliy xizmetliri muhajirettiki ziyaliylar we oqughuchilar ichide belgilik tesir qozghighan. Shunga 2017-yili Uyghur akadémiyesining tesiri türkiyedin bashqa döletlergimu kéngeytilgen. Hazirghiche türkiyedin bashqa yene amérika, yawropa döletliri, awstraliye, ottura asiya döletliri, kanada we yaponiyede ilgiri-kéyin bolup, Uyghur akadémiyeliri arqa-arqidin qurulghan. Hazirghiche jem'iy 8 dölet we qit'ede Uyghur akadémiyeliri qurulghan. Uyghur akadémiyesi terkibide xitay tetqiqati instituti, “Qutadghu bilig” instituti we ana til komitétliri qurulghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.