Сәһибә сайрамоғли: укам 5 йил түрмидә азаб чәксә, мән 5 йил сиртта күрәш қилимән

Вашингтондин мухбиримиз шөһрәт һошур тәйярлиди
2024.05.16
quddus-abduweli-Sehibe-sayramoghli.jpg Қумул оттура сотта “топлишип җамаәт тәртипини бузуш” билән әйиблинип 5 йил 4 ай кесилгән қуддус абдувәли(солда) вә амәрикада туруп униң истәк-сориқини қиливатқан һәдиси сәһибә сайрамоғли. 2024-Йили 16-май, калифорнийә.
Sehibe Sayram’oghli teminligen

Сот һөкүмлиридин мәлум болушичә, “топлишип җамаәт тәртипини бузуш” уйғур елидә 1990-йиллардин башлап йолға қоюлуватқан җаза иҗраатлирида кәң қоллиниливатқан әйиблимиләрдин биридур. Дәсләпки йилларда бәлгилик миллий вә диний кәйпияти болған тәблиғ, мәшрәп вә бир қисим тәнтәрбийә паалийәтлири “топлишип җамаәт тәртипини бузуш” дәп әйиблинип кәлгән болса, 2017 ‏-йилдин кейин, һәрқандақ бир җамаәт сорунидики һөкүмәт халимайдиған бир җүмлә яки бир еғиз сөзму, әнә шу категорийә бойичә әйиблинишкә сәвәб болған.

10‏-Май күни қумул оттура сотта 5 йил 4 ай кесилгәнлик һөкүми чиққан қуддусҗанму “топлишип җамаәт тәртипини бузуш” билән әйибләнгән.

Қумулниң евирғол районлуқ сот мәһкимиси хадимлири, һөкүмниң оттура сотта чиққанлиқини билдүрүп, өзлириниң әйиблимидин хәвири йоқлуқини ейтти.

Қуддусҗанниң нөвәттә америкида яшаватқан һәдиси сәһибәниң баян қилишичә, қуддусҗан тутулған һаман, у әһвални хәлқараға ашкарилиған. Бу чағда униң юрти борталадики хитай сақчилири уни издәп, қуддусҗанниң чоң бир мәсилиси йоқлуқи, пәқәт кичиккинә бир тәкшүрүштин кейин қоюп берилидиғанлиқини ейтқан вә чиқарған учурини өчүрүветишни тәләп қилған. Хитай сақчилиридин бу тәләп таки қуддусҗан сотланғичә болған 10 ай ичидә сәһибәниң йолдишиғиму кәлгән. Ата-анисиғиму әһвални сиртқа яймаслиқ һәққидә бесимлар ишлитилгән.

Қумул оттура сотниң йәнә бир хадимиму, қуддусҗанниң сотиниң мәхпий сот икәнликини тәкитләп, әйиблимә һәққидә учур беришни рәт қилди.

Шу күнки сотқа қатнашқан вә өзини ашкарилашни халимиған бир хадим, сотта аңлиғанлириға асасән, қуддусҗан өткән йили қумулға кәлгәндә бир түркүм достлири тәрипидин күтүвелинғанлиқи, достлар ара җәм болған бу ғиза сорунида гәптин гәп чиқип, бир сабиқ мәһбус һәққидә параң болунғанлиқи, бу параң җәрянида мәһбусниң яхши сүпәтлири тилға елинип униң “шамалға кетип қалған” лиқи тилға елинғанлиқи, сотта бу гәпләрниң “қутратқулуқ қилиш вә җамаәт тәртипини бузуш” дәп қаралғанлиқини ашкарилиди.

Бу һәқтә тәсиратини баян қилған сәһибә сайрамоғли шу сөһбәт сорунини инисиниң шу күни видийоға елип өзигә йоллап бәргәнликини, әгәр сиясий мәқсәтлик бир сорун болған болса, бу көрүнүшни йоллап беришиниң мумкинсизликини илгири сүрүп, хитай тәрәпниң иниси вә достлирини вәзипә орундаш вә сан толдуруш үчүнла җазалиғанлиқини оттуриға қойди.

Мәлум болушичә, сәһибә иниси тутқундики 10 айдин бери хитай тәрәптин өзигә кәлгән телефондики алдаш вә тәһдит селиш мәзмунидики сөзләрниң һәммисиниң авазини сақливалған.

У әгәр 5 йил 4 ай дегән бу җаза муддити муқимлашса, иниси түрмидә азаб чекиватқан бу мәзгилдә өзиниң сиртта бәш йил тохтимай күрәш қилидиғанлиқи вә инисиниң һәқсизлиққа учриған бу хәвирини дуняға яйидиғанлиқини билдүрди.

Һөрмәтлик радийо аңлиғучилар, юқирида қуддусҗан абдувәлиниң достлири билән җәм болған бир ғиза сорунида бир сабиқ мәһбусниң гепи болуп қалғанлиқи үчүнла “топлишип җамаәт тәртипини бузуш” билән әйибләнгәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.