“Shéyn” guruhining london pay chéki bazirigha kirishi Uyghur teshkilatlirining qarshiliqigha duch keldi

Uyghur mejburi emgikige chétishliq, dep eyiblinip kéliwatqan xitay moda kiyim shirkiti- “Shéyn” (Shein) guruhining london aksiye bazirida pay chéki tarqitish pilani Uyghur teshkilatlirining xirisigha duch kelgen. En'gliyediki bir dangliq adwokatliq orni ötken hepte en'gliyeni baza qilghan “Uyghur irqiy qirghinchiliqini toxtitish birleshmisi” ge wakaliten en'gliye maliye intizamini nazaret qilish da'irilirige mektup yézip, Uyghur mejburiy emgikidin paydiliniwatqan mezkur erzan bahaliq moda kiyim shirkitining london aksiye bazirida pay chéki tarqitish yolidiki herqandaq urunushini ret qilish, shundaqla uning pay chéki tarqitishigha yol qoymasliqni telep qilghan.

Léydey adwokatliq ornining ötken hepte élan qilghan bayanatida körsitilishiche, ular wakaletlik qiliwatqan “Uyghur irqiy qirghinchiliqini toxtitish birleshmisi” en'gliye maliye intizamini nazaret qilish da'irilirige “Amérika aksiye we oborot komitéti” ning “Shéyn” guruhining mejburiy emgek bilen bolghan munasiwitige da'ir endishiler seweblik amérika pay chéki bazirigha chiqishini ret qilghanliqini eskertken.

 “Shéyn” guruhi ötken yili amérika pay chéki bazirigha kirishke tirishqan bolsimu, biraq amérika aksiye we oborot komitéti amérika dölet mejlisi ezalirining bésimida mezkur xitay shirkitining amérika bazirida pay chéki tarqitishini ret qilghan idi. En'gliye léydey adwokatliq ornining adwokati rikardo gama (Ricardo Gama) 2-iyul bu heqtiki mexsus ziyaritimizni qobul qilip, en'gliye maliye intizamini nazaret qilish da'iriliridin “Shéyn” ning iltimasini ret qilishni telep qilghanliqini delillidi. Rikardo gama mundaq didi: “Biz maliye intizamini nazaret qilish da'iriliridin ‛shéyn‚ ning iltimasini testiqlimasliqni telep qilduq. ‛shéyn‚ ning iltimasi testiqlanmisa, london aksiye bazirida pay chéki tarqitalmaydu. ”

Adwukat rikardo gamaning körsitishiche, ular déloda téxi qanuni dewa-destur basquchigha kelmigen. Ular peqet maliye intizamini nazaret qilish da'irilirige mektup yézip, “Shéyn” ning ulargha yalghan sözlishi mumkinlikini, shunga “Uyghur irqiy qirghinchiliqini toxtitish birleshmisi” ning ularni “Shéyn” ning qilmishigha a'it téximu tepsiliy deliller bilen teminleydighanliqini bildürgen.

AFP

Rikardo gama mundaq dédi: “Biz téxi tekshürüsh basquchigha, jümlidin téxi sot basquchigha kelmiduq. Nöwette, biz peqet maliye intizamini nazaret qilish da'irilirige mektup yézip, bizning wakaletchimiz ‛Uyghur irqiy qirghinchiliqini toxtitish birleshmisi‚ ning ularni téximu tepsiliy détallarni öz ichige alghan deliller bilen teminlep, maliye intizamini nazaret qilghuchilarning néme üchün ‛shéyn‚ ning iltimasini testiqlimasliqi kéreklikini körsitidighanliqini, chünki ‛shéyn‚ ning zamaniwi qullar emgiki qanunigha xilapliq qilghanliqi heqqide yalghan sözlishi mumkinlikini bildürduq. ”

 “Shéyn” guruhi özining Uyghur mejburiy emgikige chétishliq ikenlikini ret qilip kelgenliki melum. Emma “Blumbérg xewerliri” 2022-yili 11-ayda élan qilghan bir doklatta körsitilishiche, “Shéyn” ning amérikigha éksport qilghan toqumichiliq mehsulatlirini tejribixanida tekshürüsh jeryanida bu mehsulatlarning “Shinjang paxtisi” da ishlepchiqirilghanliqi melum bolghan. “Uyghur irqiy qirghinchiliqini toxtitish birleshmisi” ning qurghuchisi, dunya Uyghur qurultiyining en'gliyede turushluq ishxanisining diréktori rehime mehmut amérikada pay chéki bazirigha kirishi ret qilin'ghan “Shyén” ning en'gliyedimu ret qilinishi kéreklikini bildüridu.

Léydey adwokatliq orni en'gliye maliye intizamini nazaret qilish da'irilirige mektup yézip arqidinla, yeni 26-iyun küni en'gliye yuqiri sot mehkimisi en'gliyediki “Dunyawi qanun herikiti tori” ning naraziliq erzi heqqide höküm chiqirip, en'gliye hökümet da'irilirining Uyghur mejburiy emgek mehsulatlirini tekshürmesliki qanunsizliq, dep élan qilghan idi. Rehime mehmutning 2-iyul bu heqtiki mexsus ziyaritimizni qobul qilghanda qeyt qilishiche, ular yuqiri sotning qarari “Shyén” ning en'gliye pay chéki bazirigha kirishige tesir qilidu, dégen ümidte iken.

Halbuki, léydey adwokatliq ornining adwokati rikardo gamaning bildürüshiche, yéterlik deliller “Shyén” ning teminlesh zenjiridiki jinayet teshkil qilidighan qilmishlardin paydigha érishiwatqanliqini körsetken. Rikardo gama mundaq dédi: “Deliller ‛shyén‚ ning teminlesh zenjiridiki jinayet teshkil qilidighan qilmishlardin paydigha érishiwatqanliqini yéterlik namayan qilmaqta. Eger ‛shyén‚ ning teminlesh zenjiridiki jinayi qilmishlar zamaniwi qullar emgiki jinayitini teshkil qilsa, u halda ‛shyén‚ jinayi qilmishlardin paydigha érishken bolidu. Bu jinayet we jinayettin kirim qilish qilmishigha kiridu. ”

Lékin “Shyén” özining Uyghur mejburiy emgikige chétishliq ikenlikini izchil ret qilip kelmekte. “Shyén” ning bayanatchisi ötken hepte “Maliye waqti” gézitige söz qilip “ ‛shyén‚ ning mejburiy emgekke yol qoymasliq siyasiti bar. Biz teminlesh zenjiridiki pütkül halqilarning ashkara bolushigha jiddiy qaraymiz we kishilik hoquqqa hörmet qilishta ching turimiz. Biz höddigerlirimizdin belgilen'gen rayonlarning paxtisini ishlitishini telep qilimiz” dégen. Halbuki, ular ilgiri ijtima'iy alaqe supiliridiki élan-sen'etliride mehsulatlirigha aliy süpetlik “Shinjang paxtisi” ishlitidighanliqini ilgiri sürüp kelgen. “Shyén” ning london pay chéki bazirigha kirishni iltimas qilishi, amérika hökümiti xitay toqumichiliq mehsulatlirining Uyghur mejburiy emgiki bilen bolghan munasiwitini tekshürüshni kücheytken bir waqitta sunulghan.

Amérika weten xewpsizlik ministirliqi bu yil 5-ayda Uyghur mejburiy emgikige chétishliq xitay shirketlirining qara tizimlikini kéngeytidighanliqini élan qilip, arqidinla xitayning 26 toqumichiliq shirkitini “Uyghur mejburiy emgikining aldini élish qanuni” ning cheklesh tizimlikige kirgüzgen idi.