Yawropa döletliride Uyghurlar namayish qilip, taylandtiki Uyghurlarning qoyup bérilishini telep qildi

17-Yanwar, yawropa döletliride yashaydighan Uyghurlar özliri turushluq döletlerdiki tayland elchixanisi aldida namayish qilip, taylandta tutup turuluwatqan 48 neper Uyghurning derhal qoyup bérilishini telep qildi.

Taylandta tutup turuluwatqan bu 48 neper Uyghurning nechche kün aldida tarqatqan muraji'etnamisi we hazirqi ehwali pütün dunyadiki Uyghurlarni endishige salghan bolup, bu munasiwet bilen dunya Uyghur qurultiyi17-yanwar küni pütün dunya miqyasida keng kölemlik namayish élip bérishqa chaqiriq qilghanidi.

Bu chaqiriqqa awaz qoshqan, norwégiye Uyghur komitéti bügün, 17-yanwar küni norwégiye paytexti oslodiki tayland elchixanisi aldida tayland hökümitidin xitaygha qayturulush xewpi astidiki bu 48 neper Uyghurni qoyup bérishni telep qilip namayish élip barghan we tayland elchixanisigha telep xéti tapshurghan.

Norwégiye Uyghur komitéti re'isi xelchem memtimin bu heqtiki tepsilatlarni radiyo anglighuchilar bilen ortaqliship “Tayland elchixanisidin bu Uyghurlarning üchinchi bir bixeter döletke yötkilishige yol qoyushini” telep qilghanliqini bildürdi.

Bu namayish heqqide norwégiyediki ihsan shükranmu özining bezi tesiratlirini ortaqlashti.

Shiwétsiye Uyghur birliki re'isi bextinur xanimmu shiwétsiyede élip bérilghan namayish heqqidiki pikrini bayan qildi.

Ziyaritimizni qobul qilghan shiwétsiye Uyghur birlikidin nijat namayishning teshkillinishi we munasiwetlik uchurlarni ortaqlashti.

Oxshash künde shiwétsariye Uyghur jem'iyitimu taylandning zurixtiki konsulxanisigha telep xéti tapshurghan bolup, shiwétsariye Uyghur jem'iyiti sabiq re'isi endili qaraxanning bildürüshiche, ular tayland elchixanisigha tapshurghan telepnamide “Taylandta tutup turuluwatqan bu 48 neper Uyghur eger xitaygha qayturulsa, ularning türlük paji'elerge duchar bolidighanliqini” alahide eskertken.

En'gliyening paytexti londondimu en'gliye Uyghur komitéti, Uyghur irqiy qirghinchiliqini toxtitish herikiti we Uyghurlargha yardem teshkilati tayland konsulxanisining aldida namayish élip barghan bolup, rehime mehmut xanim bu heqtiki tepsilatlarni radiyo anglighuchilar bilen ortaqlashti.

Shiwétsiye, shiwétsariye, gérmaniye, norwégiye, en'gliye, türkiye, yaponiye, kanada, amérika we awstraliye qatarliq döletlerdiki Uyghurlar, özliri turushluq döletlerdiki tayland elchixaniliri aldida her xil shekildiki namayishlarni élip bérip, tayland hökümitini xelq'ara köchmenler qanuniy we kishilik hoquq ehdinamisige ri'aye qilishqa chaqiriq qilghan.