Almatada kommunar talip oghlining 65 yilliqigha béghishlan'ghan ilmiy muhakime yighini ötküzüldi
2012.12.06
“Merkiziy asiyadiki étnika we medeniyet” témisidiki mezkur xatire yighinida merhumning qazaqistan penige qoshqan töhpisi, uning insaniy peziletliri alahide tekitlendi. Uninggha qatnashqan tarixchi, tilshunas, edebiyatshunas, iqtisatchi, peylasop, alimlar merkiziy asiya memliketliri arisidiki siyasiy we iqtisadiy alaqiler, étniklarning ötmüsh tarixi, medeniyiti, dini, öz - ara munasiwetliri heqqide doklatlar oqudi. Yighinda shundaqla Uyghur élining tereqqiyat mesililirige, Uyghurlarning medeniyitige, tarixigha hem bügünki ehwaligha da'ir qiziqarliq mesililermu muhakime qilindi.
Atap éytqanda, tarix penlirining doktori risalet kerimowaning “Qedimiy we ottura esirler dewridiki sherqiy türkistanning shekillinish tarixi”, iqtisad penlirining namzati güljahan haji'éwaning “Türkiy memliketlirini birleshtürüsh jeryanlirining amilliri”, tarix penlirining namzati güzel bahawdinowaning “21 - Esirning béshidiki sh u a r ning rawajlinish mesililiri we kélechiki”, filologiye penlirining namzati rexmetjan yüsüpofning“19 - Esirning axiri - 20 - esirning bashliridiki sherqiy türkistan edebiyatida milliy - azadliq küresh idéyisi” namliq doklatlar shular jümlisidindur.
Melumki, kammunar talipof qazaq dölet uniwérsitétini tamamlighandin kéyin qazaqstan penler akadémiyisi pelsepe institutida ilmiy xadim, andin 1986 - yili penler akadémiyiside Uyghurshunasliq instituti qurulghanda, uning mudirining mu'awini, shundaqla bölüm bashliqi, kéyinirek bolsa institut mudiri lawazimlirini atqurghan. 1996 - Yildin bashlap ta 2007 - yilghiche sherqshunasliq instituti terkipidiki Uyghurshunasliq merkizining rehbiri bolup ishligen. K.Talipof hayatining axirqi waqitlirida 1930 - we 40 - yillarda qurulghan sherqiy türkistan jumhuriyetliri tarixi we shu döletlerde xizmet qilghan bir qatar erbaplarning hayati mesililiri bilen shughullan'ghan.
Mezkur ilmiy muhakime yighini kélechekte mushu mezmunda xelq'araliq enjumanlarni uyushturush qararini aldi.
Radi'omiz ziyaritini qobul qilghan abay namidiki qazaq milliy pédagogika uniwérsitétining proféssori dimitriy mén kammunar talipof we enjuman heqqide eslimilirini bayan qildi.