Misirdiki xelq rayini sinash pa'aliyitining axiriqi netijisi

Shuningdin kéyin, misir hökümiti bu yéngi qanun toghriliq xelqning rayini sinash pa'aliyiti élip bérishni qarar qilghan idi.

Birinchi qétimliq xelq rayini sinash pa'aliyiti 2012 - yili 15 - dikabir küni élip bérilghan bolup, uninggha misirning 10 chong wilayitidin jemi 9 milyondin köprek adem ishtirak qilip awaz bergen. Netije yéngi qanunni qollaydighanlarning teripige bolghan. Chünki yéngi qanunni qollaydighanlarning awazi 56 pirsentni, qollimaydighanlarning awazi 43 pirsentni teshkil qilghan idi.

Ikkinchi qétimliq xelq rayini sinash pa'aliyiti 2012 - yili 22 - dikabir küni élip bérilghan bolup, uninggha misirning 17 wilayitidin jemi 16 milyondin köprek adem ishtirak qilip awaz bergen. Netije yenila yéngi qanunni qollaydighan teripige bolghan. Buningda yéngi qanunni qollaydighanlarning awazi 71 pirsentni, qollimaydighanlarning awazi 29 pirsentni teshkil qilghan.

Ereb döletlirining diqqet - étibari bu künlerde süriyidin köprek misirgha qaritilghan bolup, hemme misirda élip bérilghan xelqning rayini sinash pa'aliyitining netijisini kütken idi. Hetta netije élan qilinishtin burun her xil tehliller we köz qarashlar élan qilinishqa bashlighan idi. Chünki, misirning ereb döletliri arisidiki orni nahayiti muhim bolup, misirda bolidighan qandaqla bir özgirish bashqa qoshna döletlerge choqum tesir körsitidu.

Ereb döletlirining teshwiqat wasitiliri misirning xewerliri bilen tolghan bolup, misir hökümitini qollaydighanlar we uninggha qarshi turidighan hemmisi öz köz qarashlirini we tehlillirini élan qilip kelmekte.

Xelqning tallishi ghelibe qilidu

Se'udi erebistanida chiqidighan “El medine” gézitining 2012 - yili 24 - dikabir künidiki sanida “Xelqning küchi her zaman ghelibe qilidu” dégen témida bir maqale élan qilin'ghan bolup, uningda mundaq dep yézilghan:“Axiriqi waqitlarda misir re'isi doktur mursining birdinla qanunni özgertish heqqidiki élani misirning ichi we sirtida her xil köz qarashlarni peyda qilghan idi. Beziler re'isning qilghanlirini misirdiki musulman qérindashlar jama'iti misir dölitini özige boysunduruwaldi dep qarshi chiqsa, yene beziler sabiq diktatorlarning zamanidiki qanun özgirishi kérek idi dédi. Ishqilip hemme özining rayini sözligen boldi. Axiri misirda yéngi qanun toghriliq xelqning rayini sinash pa'aliyiti élip bérish qarari qilindi. Hemde ikki qétimliq xelq rayini sinashta yene yéngi qanun ghelibe qildi. Undaqta, bu xelq bu hökümetni xalaydu, xelq yéngi qanunni qollaydu dégenlik boldi. Démokratiye dégen zadi xelqning hakimiyiti emesmu? xelqning köp sanliqi, hetta omum xelqning üchtin ikkisi yéngi qanunni we hazirqi hökümetni qollighan iken, mesile hel bolmidimu? emdi yene narazi bolghuchilargha néme déyish kérek? emdi hazirqi hökümetni aghdurup tashlash teshwiqatini qilip otturigha chiqqanlar kimler dések, ular asasen mubarekning zamanida mensep tutqan we hazir uningdin quruq qalghanlarni teshkil qilidu. Bularning bashlamchiliri xelq'ara atom énirgiye agéntliqining sabiq mudiri muhemmed beradi'i, ereb döletliri ittipaqining sabiq bash katibi emr musa we mubarek hökümitining ademliridin ibarettur. Emma qarshi terepte xelq bar, xelq bolupmu milyonlighan xelq mursini qollaydiken. Ehwal bundaq tursa, xelqning ixtiyarigha hörmet qilishtin bashqa chare qalmaydu.”