Türkiyidiki qazaqistan elchixanisi türk we Uyghurlarni teqdirlidi

Türkiye, 1991-yili ottura asiya türk jumhuriyetliri musteqil bolghanda ularni étirap qilghan tunji dölet bolush süpiti bilen her yili bu jumhuriyetlerning qurulush künlirini daghdughiliq ötküzüp kelmekte. Bu yil 12-dékabir küni türkiyining ottura qismigha jaylashqan newshehir wilayitide qazaqistan jumhuriyitining qurulush xatire küni tentene bilen tebriklendi. Bu pa'aliyetni newshehir waliyliqi, qazaqistanning newshehirde turushluq pexriy konsulxanisi we qazaqistan bash elchixanisi birliship uyushturghan. Bu pa'aliyet qazaqistan musteqilliqining 21 yilliq tarixini tonushturghan resim körgezmisi, qazaqistan-türkiye munasiwiti heqqidiki pikir almashturush yighini hem qazaqistan-türkiye munasiwitige töhpe qoshqanlarni mukapatlash murasimi qatarliqlarni öz ichige alghan.

RFA/Erkin Tarim

Bu pa'aliyetke qazaqistanning newshehirdiki pexriy konsuli doktor xalil ulu'erning dewitige bina'en dunya Uyghur qurultiyi mu'awin re'isi, sherqiy türkistan kültür we hemkarliq jem'iyiti re'isi séyit tümtürk qatnashti we barliq Uyghurlargha wakaliten qazaqistan jumhuriyitining mukapatini tapshurup aldi. Pa'aliyetke yene newshehir wilayitining waliysi, sheher bashliqi, newshehir uniwérsitétining mudir hem oqutquchi-oqughuchiliri qatnashti. Pa'aliyet dawamida qazaqistanning türkiye bash elchisi janséyit tüymebayéf qazaqistan-türkiye munasiwitige töhpe qoshqan waliy abdurrahman sawash, parlamént ezasi ahmet erdal fer'alan, murat göktürk, ebubekir gizligider, newshehir sheher bashliqi hesen ünwer, qazaqistanning newshehirdiki pexriy konsuli xalil ulu'er we dunya Uyghur qurultiyi mu'awin re'isi séyit tümtürklerge xatire taxtisi teqdim qildi we rehmitini bildürdi.

RFA/Erkin Tarim

Néwshehir sheherlik hökümetning tor békitidiki xewerge asaslan'ghanda mukapatlash murasimida qazaqistan bash elchisi janséyit tüymebayéf söz qilip, uzun yillardin buyan ata yurttiki qérindashlar bilen ana yurttiki qérindashlarning otturisigha bezi tashqi küchler tosalghu qurghan bolsimu, 21 yil burun bu tosalghuning élip tashlan'ghanliqini, qérindashlarning bir-biri bilen quchaqlashqanliqini éytqan.

Bash elchi tüymebayéf qazaq-türk qérindashliqi heqqide munularni dégen:
“Biz qérindash. Dunyaning eng güzel yérige jaylashqan türkiye, yawropada yalghuz emes. Burun birleshken döletler teshkilatida bir awazgha ige bolghan türkiyining arqisida bügünki künde alte dölet bar. Bügünki künde qazaqistanning qanallirida türk filimliri qoyulmaqta. Qiz-ayallirimiz türk sen'etchilirini bekmu yaxshi köridu. Yer asti we yer üsti bayliqlirimizni siz qérindashlirimiz bilen ortaq paydilinishtin pexirlinimiz. Bundin kéyinmu dawamliq halda jem bolup, munasiwitimizni téximu yéqinlashturush niyitidemiz.”

Biz bu pa'aliyet heqqide téximu tepsiliy melumat igilesh üchün qazaqistan jumhuriyiti teripidin mukapatlan'ghan siyit tümtürk ependi bilen söhbet élip barduq.