Rabiye qadir xanim norwégiyide xizmet ziyaritide boldi

Norwégiye Uyghur komitétining teshkillishi bilen oslo we yéqin etraptiki Uyghur jama'iti ayrodromgha chiqip rabiye xanimni qizghin kütüwaldi.

Rabiye qadir xanim 13-yanwar yekshenbe küni Uyghur islam medeniyet merkizi qarmiqida yéqinda oslo shehiride échilghan Uyghur meschitini ziyaret qildi we Uyghur jama'iti bilen körüshti shundaqla hemmeylenni Uyghur meschitining qurulushi bilen tebriklidi. Rabiye xanim yene jama'et toplishidighan bundaq bir merkezning bolushining norwégiyidiki Uyghurlarning ömlük- inaqliqi hemde ösüp yétiliwatqan perzentlerning Uyghur ana tili, Uyghur medeniyiti we islam eqidiliri bilen terbiyilinishi üchün qanchilik muhim ehmiyetke ige bolidighanliqini chüshendürdi.

RFA/Aygul

Ziyaret pa'aliyiti jeryanida rabiye qadir xanim köpchilikke dunya Uyghur qurultiyining yéqinqi mezgilde ishligen xizmetlirini doklat qildi we bu yil ichide qilmaqchi bolghan ish pilanliri heqqide sözlep ötti.

Norwégiyining döletlik téléwiziye qanili bolghan t w 2 yéngi échilghan meschitni we pa'aliyet jeryanini süretke aldi.

Meschittiki kütüwélish pa'aliyiti axirlashqandin kéyin, rabiye xanim norwégiye nobél tinchliq merkizige kélip t w 2 ning ziyaritini qobul qildi. Rabiye qadir xanim téléwiziye muxbirlirigha, özining bu qétimqi norwégiye sepirining asasi meqsitini tonushturush bilen birge, Uyghurlarning kishilik hoquq weziyitining nöwette téximu yamanliship ketkenlikini emeliy pakitlar bilen bayan qildi. Bolupmu, sherqiy türkistandiki Uyghur ayalliri we balilirining tartiwatqan zulumliri üstide alahide toxtaldi.

Norwégiye rafto jem'iyitining sabiq bashliqi, Uyghurlarning dosti arne liynard we mu'awin re'is ömer qanatlar söz qilip, bu qétimqi ziyaret pa'aliyitide bu körüshüsh pa'aliyitini orunlashturghan norwégiye Uyghur komitéti bilen Uyghur islam medeniyet merkizige rehmetlirini bildürdi we Uyghurlarning nöwettiki omumi ehwali heqqide soz qildi.