Uyghur hünerwen yasighan yaghach mashina 6 aydin béri qeshqerde saghlam qatnimaqta

Qeshqer shehiridiki hünerwen memtimin semerning matorluq yaghach mashina yasap chiqishi ene shu tirishchanliqning bir misali. Melum bolushiche, bu yil 6-ayda qeshqer yermenkisige qoyulghan mezkur yaghach mashina 6 aydin béri qeshqer kochilirida saghlam qatnimaqta. Muxbirimiz mezkur mashinining ishlesh prinsipliri we nöwettiki ishlitish ehwali heqqide mashinining ijadkari memtimin semer bilen söhbet ötküzdi.

So'al: essalamu'eleykum, yaxshimusiz?
Jawab: we'eleykum essalam, men yaxshi, özingizchu?

So'al: siz qeshqerdiki matorluq yaghach mashina yasighan kishi bolamsiz?
Jawab: shundaq, men shu.

So'al: men amérikidin téléfon qiliwatimen, erkin asiya radi'osidin.
Jawab: téléfon qilghiningiz üchün rehmet.

So'al: biz, siz yasighan mashinini yermenke heqqidiki xewerlerdin körgen. Mashinining hazirqi ehwali qandaq: buzulmay-chuwulmay méngiwatamdu?
Jawab: méngiwatidu. A'ile mashinisi ornida ishlitiwatimen؛ künige qeshqer sheher ichige bir-ikki qétim kirip chiqimen, uningdin bashqa (esli mehellem) yamanyarghimu ayda bir-ikki qétim bérip kélip turimen.

So'al: yamanyarghimu mushu yaghach mashiningiz bilen baramsiz?
Jawab: shundaq.

So'al: undaqta, bu yaghach mashina a'ilingizning asasliq bir ishlepchiqirish qoraliken-de?
Jawab: del shundaq.

So'al: mashiningizning ishlesh prinsipi qandaq? yeni qandaq heriketlinidu?
Jawab: mashinining köp qismi yaghachtin qurashturulghan, az bir qismi métal؛ matorluq, tok arqiliq mangidu.

So'al: mashiningizning adettiki tömür mashinilargha nisbeten éytqanda artuq-kem terepliri qaysi?
Jawab: birinchisi, tennerxi töwen, ikkinchisi perqliq bolghachqa kishilerni qiziqturidu. Üchinchisi, anglisam tömürdin yasalghan nersiler yaghachtin yasalghan'gha qarighanda ziyanliq dep qarilidiken, shunga ziyanliq emes. Yétersizliki tömür mashinilardek sür'iti téz emes, sa'itige 20-30 kilométir, téz bolghanda 40 kilométir sür'ette mangghili bolidu.

So'al: siz mashinini yasashta, mushu xil mashinini omumlashturush, ishlepchiqirishta paydilinish meqsitide yasighanmu yaki peqet bir hüner-maharet körsitish üchün yasalghanmu?
Jawab: her ikkisi bar. Men bir hünerwen, talda choyla yasashtin tartip yaghachta wélisipit yasashqa qeder jiq nerse yasap béqiptimen, yaghachta mashina yasighili némishqa bolmighudek depla tirishtim, axiri yasap chiqtim, 6 aydin béri méngiwatidu, 90 % siniqimdin ötti, ghelibe qildim.

So'al: yaghach mashiningiz yermenkige qoyuldi, eyni chaghda köpligen axbarat wasitilirining diqqitini tartti, héch bolmidi dégende mushu nuqtidin bolsimu özingiz tewe yéza yaki kenttin bir qollash, righbetlendürüshke érishtingizmu?
Jawab: yaq, undaq ish bolmidi. Men eslide yéngisherning yamanyar yézisidin, 13 yildin béri, qeshqer sheher ichidiki hezrette turuwatimen. Belkim ikki ariliqta bolghinim üchün izdigüchiler bolmidi.

So'al: buningdin kéyinki pilanliringiz néme? yene bashqa yéngi nersilerni yasap béqish oyingiz barmu?
Jawab: (iqtisadi) ehwalim bek yaxshi emes, bir tereptin a'ilidiki 4 balini béqish, yene bir tereptin mushundaq hüner-maharetlirimizni körsitish bilen ötüwatimen. Burunmu yaghachta wélisipit yasighan idim, hazirghiche qolliniwatimen, yaghach mashininimu 3-4 yilda yasap chiqtim. Yéqindin buyan sizge oxshash qollighuchilirim köpiyiwatidu؛ insha'alla, aldimizdiki yillarda yene yéngi nersilerni yasash oyum bar....