Ürümchidiki saqchi xadimliri ot apitide ishikke sélin'ghan qulupning ölüm sanini ashurghanliqini étirap qildi

Muxbirimiz shöhret hoshur
2022.11.28
Share on WhatsApp
Share on WhatsApp
urumchi-ot-apiti-24-noyabir.jpg
AP

Ürümchidiki xadimlar, ot apitidiki ölüm hadisisige quluplinishning seweb bolghanliqini delillidi.

Xitay da'iriliri 24-noyabir ot apiti heqqide achqan axbarat yighinida, ot ketken bina jaylashqan ahaliler rayonining yuqum katégoriyesi boyiche “Yénik késel rayoni” ikenliki, binadiki ahalilerning sirtqa chiqip-kirish imkani barliqini tilgha aldi, emeliyette, ijtima'iy taratqulardiki yüzlerche sin körünüshliridin binaning pütün ishiklirining qulup séliqliq, hetta payat qiliwétiklik halette ikenliki melum idi. Shunga biz téléfon ziyaretlirimiz dawamida, binaning ishikliri heqqide nuqtiliq halda so'al soriduq. Ürümchidiki baxulyang saqchixana xadimi weqe heqqide, axbarat yighinidiki uchurlarni asas qilishimizni we ighwa sözlerge ishenmeslikimizni tewsiye qilish bilen birlikte, ölgenler sanining köpiyip kétishide, binaning ishiklirining taqaq bolushining hel qilghuch rol oynighanliqini inkar qilmidi.

Bextyoli saqchixana xadimi, özining yaridarlarni qutquzush üchün binaning ichige néme üchün kirmigenlikini sorighinimizda “Ishikler taqaq” dep jawab berdi. U bu heqte ilgirilep sorighan so'allirimizgha jawab bérishni ret qildi.

Xitayning axbarat yighinida yene weqede ölgenler sani 10, yaridarlar sani 9 dep bildürülgen. Emma ot yalquni we is-tütekning 15-qewetni bashlap 7 qewetni qaplighanliqidek ré'alliqni körüp turghan ahaliler bu uchurgha qilche ishenmigen.

Ürümchi 24-noyabir ot apitide éghir derijide köyüp ketken égiz qewetlik olturaq binaning ottin kéyinki hali. Ijtima'iy taratqu sin körünüshi, 2022-yili 25-noyabir, ürümchi.

Ahalilerdin biri, bina ishiklirining taqalghanliqidek ré'alliqini yoshurghan xitay da'irilrining ölüm sanini tebi'iy halda yoshuridighanliqini bayan qildi. U, doxturxana sahesidin anglighanlirigha asasen, az dégende 40 nechche kishi ölgenlikini tilgha aldi. Bu ahale teminligen téléfon nomurigha asasen, yaridarlarni dawalashqa qatnashqan melum bir doxturxana xadimidin melumat soriduq. U, özi ishligen bölümge 5 yaridarning élip kélin'genliki we beshiningla saqiyalmay jan üzgenlikini ashkarilidi. Bashqa bölümlerge qanchilik yaridar élip kélin'genlikini sorighinimizda, buningdin xewersizlikini éytti. Hökümet élan qilghan san'gha, hökümet xadimliriningmu ishenmigenlikini tilgha alghan bir xadim, anglighanlirigha asasen, 9 kishining köyüp ölgenliki, 10 nechche kishining bolsa ista boghulup ölgenliki we jem'iy 26 kishi ölgenlikini bayan qildi.

Ehwaldin xewerdar mezkur ahalining déyishiche, u ot ketken binagha qoshna binada olturushluq bolup, otta köygenlerning peryadlirini anglap we körüp berdashliq bérelmigen, emma yardem qilay dése özlirining ishiki taqaq bolghachqa, binadin chiqalmighan. Bu xadimning déyishiche, teweliktiki binalarning normal ishikliridin bashqa, ot apiti yüz bergende chiqip kétish békitilgen ot bixeterlik ishikliri we tünglüklermu taqiwétilgen. Uning üstige binaning aldigha ornitilghan yaghach we tömür tosuqlar bolup, bu tosuqlarni pachaqlap tashlash üchünmu ot öchürüsh xadimliri sa'etlep waqit serp qilghan. Binaning aldidiki mashinilar 3 aydin béri heydelmigen bolghachqa, ot almighan we bezi mashinilarning igiliri karantinda bolghachqa, bu mashinilarni yötkigili'i bolmighan, netijide ot öchürüsh mashinisi binagha yéqinlishalmay su shlankisi 15-we 16-qewetlerge yetmey, otni tizginligini bolmighan. Bu ehwalni bir xitay ahalisimu tordiki inkasida bayan qilidu.

Inkas qilinishiche, ot öchürüsh xadimliri, peqet binagha uzaqtin su chéchish, etrapqa mashina yighiwélish bilen bolghan, emma binaning ishikini tézidin chéqish we bésip kirishke urunmighan. Bezi ahaliler ot xadimlirining xeterdin qorqqanliqini bayan qilsa, yene beziliri, ishikni échishta, yuqiridin yeni merkezdin buyruq kütkenlikini ilgiri sürdi. 119 Jiddiy qutquzush qomandanliq merkizi, ot kétishning sewebi, otning ulghiyishi we ölümning köpiyishidiki seweb we jawabkarlar üstide tekshürüsh élip bériliwatqanliqini melum qildi. Emma, ahaliler, bu ot apiti we uning ziyan-zexmetlirige qamal seweb bolghanliqi we jawabkarning her derijilik hökümet ikenlikini tekitleshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.